Van Huffelen mes di: Kòrsou NO ta lomba kant’i muraya! Hulanda ta konfirma ku no tin problema si tuma mas tempu pa paga e 911 mion bèk.

 

 

Van Huffelen mes di: Kòrsou NO ta lomba kant’i muraya!

Hulanda ta konfirma ku no tin problema si tuma mas tempu pa paga e 911 mion bèk.

 

 

Willemstad — Djabierne ultimo Hulanda a anunsia ku lo aplasá pago bèk dje sosten di likides di moda ku por diskuti su refinansiamentu responsabel. Partido PIN no a premira otro. Pesei mes PIN su kritika riba gobièrnu Pisas su insistensia pa traga COHO sin kita, sin pone, spantando komunidat ku no tin sen pa paga e mionesnan bèk imediatamente.

Awor ku e argumentu falsu ei definitivamente ta foi mesa, nos mester para ketu na un aspekto dje fondo ku pais mester di dje.

 

Babilonia politiko

Den kabinete Pisas mes difente minister ta papia diferente idioma. Sr. Cooper a bisa di ta warda prome minister regresa pa e haña splikashon di su deklarashonnan den e programa Punto Final. Di otro banda minister Van Heydoorn, a la ves presidente di partido MFK, a anunsia ku no tin mester di COHO mes paso kos ta kanando masha bon. Komo cheri riba e bolo di konfushon ta resulta ku debidamente tabata papiando tokante aplasá pago bek dje sosten di likides. Partido PIN ta konvensi di esei komo kiera ku ta inkonsebibel ku sekretario di estado Van Huffelen a atende esaki den Konseho di Minister di Reino sin ku paisnan tabata sa esaki.

A base di e ultimo suseso aki lamentablemente PIN no por hasi otro ku konklui ku sr. Pisas ke a pasa su mes gobièrnu i komunidat un ‘fastbal’ òf ku ya e la perde tur grip riba rumbo di pais. Ambos kaso ta motibu pa prekupashon.

 

Fondo pa ekonomia

Awor ku gobiernu Pisas su argumento falsu pa guli COHO definitivamente ta foi mesa, pero konsiente ku tin palabrashon pa paga e sosten di likides bek riba termino largu, mester para ketu na loke Korsou tin nesesidat di haña enbes di duna na e momentunan aki.

Pa pais stop di koba wil mester fondo pa reforma i stimula ekonomia. Pesei ta remarkabel ku niun kaminda den e proposishon di lei di  COHO no ta skibí ku Ulanda ta mara su mes na sikiera un parti di e invershonnan kuantioso ku ta nesesario pa nos rekuperashon ekonomiko. Ta mas straño ainda ku gobièrnu Pisas por bai di akuerdo ku e omishon aki siendo ku sigur lo mester entre 1 pa 2 miart di invershon den servisionan publiko manera entre otro enseñansa i infrastruktura na un banda, i den un fondo pa stimulashon ekonomiko di otro banda.

 

Sosten

Partido PIN, den su konvikshon ku e yu di Kòrsou ta dotá, ta anima gobièrnu Pisas pa tira fatalismo un kantu, tene na e bentana ku sra. Van Huffelen a habri i kana un kaminda serio pa renegoshá e lei di COHO ku konfiansa, atendiendo puntonan di mehorashon ku PIN mes a indika diferente biaha. Den nan tin e nesesidat pa  spesifikashon di fondonan disponibel pa inverti den reforma i kresementu ekonomiko