Honor na sr. Manuel C. Piar 3 di aprel 2022, e akto seremonial di kolekshon di tera di restunan di Sr. Manuel Carlos Piar ta tumá lugá.

Honor na sr. Manuel C. Piar
3 di aprel 2022, e akto seremonial di kolekshon di tera di restunan di Sr. Manuel Carlos Piar ta tumá lugá.
WILLEMSTAD – Gobièrnu di Kòrsou ta den preparashon pa huntu ku Gobièrnu di Venezuela duna honor na nos General en Hefe sr. Manuel Carlos Piar, nasé na Kòrsou riba 28 di aprel na aña 1774. Esaki ta pa motibu ku Gobièrnu di Venezuela a hasi un petishon na nos pa hiba i kompartí ku nan di forma simbóliko e restunan di nos héroe nashonal di Kòrsou, General en Hefe Manuel C. Piar. Ta e intenshon pa e restunan di forma simbóliko keda hibá na Panteón Nashonal di Venezuela. Gobièrnu di Kòrsou a bai di akuerdo ku e petishon aki i a lanta un komishon ku ta prepará i guia e trayekto aki.
Na Venezuela ya tabatin kolekshon simbóliko di tera di Manuel Piar, na diferente sitio na Cuidad Bolivar, San Félix, El Juncal i Maturin. Sektor di Kultura i Deporte (SKD) di Ministerio di Enseñansa, Siensia, Kultura i Deporte (ESKD), den estrecho kolaborashon ku e komishon, riba dia 3 di aprel 2022, ta koordiná un seri di evento. E eventonan ta kolekshon di tera na Kòrsou aki pa asina esaki representá e restunan ku di forma simbóliko lo keda entrega komo esnan di Manuel Carlos Piar. E Programa pa e dia akí ta bai tumá lugá for di mainta tempran na Sentro di Bario Groot Kwartier i Sentro di Bario Kanga/Dein.
Den Otrabanda na Rifwaterstraat na e sitio kaminda sr. Manuel C. Piar a nase pa 09:45 am, ta tene un seremonia di kolekshon di tera pa despues hiba e restunan na Basílika di Santa Ana na Otrobanda. Ta tene un santu sakrifisio di misa di 11:00 pa 12:00pm. E programa ta terminá ku un shou kultural ku ta simbolisá e laso fraternal entre e dos paisnan.
Dia 11 di aprel próksimo ta sigui ku seremonia na San Felix na Venezuela, durante konmemorashon di 205 aña di e bataya ku a tumá lugá na e sitio ei. Aki ta pone tur e teranan ku a keda kolektá na Kòrsou huntu, pa asina hasi tur preparashon pa hiba e restunan simbóliko pa “Panteón Nacional de Venezuela” na Caracas.
Pa konkluí e akto seremonial komo honor na nos héroe sr. Manuel C. Piar lo tin un programa na “Panteón Nacional de Venezuela”, na Caracas, Venezuela, ku ta planiá pa tumá lugá dia 28 di aprel 2022, riba fecha natalisio di Manuel Carlos Piar.
Den e anekso por tuma nota di e invitashon na e aktividat pa dia 3 aprel 2022.
May be an image of 1 person and text
Arabella van der Gen
Share this page to Telegram

This site uses Akismet to reduce spam. Learn how your comment data is processed.

%d bloggers like this: