Minister Rocco Tjon: A HAYA RECORIDO Y PRESENTACION AMPLIO DI DIRECTIVA Y TRAHADONAN DI ORTHOPEDAGOGISCHE CENTRUM (OC)

[videopress ZBzM6skD]

 

Minister Rocco Tjon:
A HAYA RECORIDO Y PRESENTACION AMPLIO DI DIRECTIVA Y TRAHADONAN DI ORTHOPEDAGOGISCHE CENTRUM (OC)

 

ORANJESTAD – Siman pasa, durante un bishita na Orthopedagogische Centrum (OC) situa na Dakota, Minister di Husticia y Asuntonan Social Sr. Rocco Tjon a logra haya un bon bista di tur e trabounan cu ta wordo haci, pero tambe e retonan cu nan tin. Durante e bishita aki, a logra pasa cada departamento, y a combersa cu e profesionalnan cu ta traha na OC, y a logra determina kico ta e necesidadnan cu nan tin, como tambe e oportunidadnan cu nan lo desea di tin, pa asina nan por sigui mehora nan mes y e centro.

 

OC ta un centro cu ta destina pa hobennan entre 12 cu 18 aña cu tin problemanan psicosocial di cual e mayornan tin dificultad pa guianan. Dentro di OC tin diferente departamento cu ta trata hobennan a base di nan problematica. E hobennan cu ta hospeda aki ta pasa door di un trayecto di diferente fase. Actualmente ta trahando cu e “Youturn Model”, cual ta ensera un cambio di 180 grado pa e hoben. E meta di e “Youturn Model” ta pa stimula e confiansa propio y respet pa otro, tambe e hoben ta desaroya mas riba aspectonan di habilidad social, responsabilidad propio y ta siña tambe pa rasona mas riba su moralidad.

 

Durante e recorido extenso di cada departamento, a haya e oportunidad pa combersa cu algun di e hobennan cu ta hospeda na OC, asina tumando nota di kico tur OC ta haci pa nan, y con nan ta experencia esaki. Segun e Mandatario, e ta importante pa accentua cu OC ta un di e departamentonan cu ta hiba un maneho financiero sumamente eficiente, tambe por menciona cu a ricibi varios “investeringsaanvragen” for di directiva di OC.

Por ultimo, Minister Tjon a expresa cu e bishita aki tawata uno sumamente positivo, unda a logra delinea e colaboracion entre Ministerio y OC. Pues, cu aprobacion di presupuesto 2022, lo bay tin varios proyecto relativamente chikito, pero cu un impacto sumamente grandi pa OC, cu lo por wordo realisa.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: