Minister Arends ta presenta National Plan for Stray Animals (NPSA)
Minister Arends ta presenta National Plan for Stray Animals (NPSA)
Den un conferencia di prensa diahuebs 6 di April 2022, Minister di Naturalesa, Ursell Arends a presenta National Plan for Stray Animals (NPSA), como forma pa atende cu e problematica di cacho riba caya.
E plan aki a ser hereda di Gabinete Wever Croes 1 cu den 2019 a lansa e Plan Nacional pero pa cual no tabata tin fondo disponibel. Den oktober 2021, Ministerio di Naturalesa a actualisa esaki y a percura pa tin e fondonanan pa por ehecuta e plan, cu caracter di urgencia di e problematica.
Minister Arends a observa un division entre stakeholders pa motibo di diferente vision riba e solucion pa e problematica. Esaki den corto por ser describi como un diferencia entre un pensamento di Trap, Neuter & Release (TNR), y un pensamento cu ta tene cuenta cu e leynan exsistente y e problematica di cachonan riba caya, mirando e realidad grave di e situacion actual.
Mester tene cuenta cu tin un grupo grandi cu tambe ta vocifera nan preocupacion y derechonan, cual ta e grupo cu ta sinti molester di animalnan riba caya. Entre otro tin e peaton, ciclistanan y e sector di horeca y hotelero.
Ta importante pa enfatisa cu e plan aki ta forma parti di e maneho integral pa loke ta trata Naturalesa y Bienestar di Animal cu lo ser publica den e siguiente periodo nos dilanti. Den e maneho lo enfoka riba puntonan di atencion cu ta trece e bienestar di nos animalnan den peliger por ehemplo maltrato y negligencia, mientras ta stimula un cuido responsabel y cu cariño.
Durante e conferencia di prensa tambe a lansa un campaña di Gobierno di Aruba den colaboracion cu Post Aruba N.V. pa asina stimula doñonan riba nan responsabilidad pa mantene nan mascota den cura den un forma conforme e ley.
