Minister Maduro di Finansa ta informa: Hefenan di Departamento di Gobierno a wordo informa riba e situacion y e retonan financiero di Pais Aruba

ORANJESTAD – Durante e encuentro pa Hefenan di Departamento di Gobierno, sr. Derrick Werleman, Director di Departamento di Finansa a presenta e situacion financiero di Pais Aruba y a duna un bista di e retonan cu tin nos dilanti.

Mester reduci e deficit di aña 2022 aun mas
Den e presentacion titula ‘Con nos ta para?,’ a splica cu tin algun paso mester wordo tuma pa asina por sigui reduci e deficit pa aña 2022, cu awor ta na 228 miyon florin. Desde aña 2020 pa awor, a logra baha e deficit cu 536 miyon florin, pero e deficit mester bira mas chikito y bay den rumbo di un presupuesto balansa of cu un surplus. Pa logra e baha e deficit aki aun mas, e ta bay exigi un reduccion di gasto y tambe un aumento di entrada. E cooperacion di e Hefenan di Departamento ta crucial pa por logra reduci mas gasto di gobernacion.

Retonan nos dilanti
Pa locual ta trata e supervision financiero, nos Pais lo conoce normanan nobo cu lo bay exigi un disciplina financiero fuerte pa por cumpli cu nan. Banda di esaki tin e trabounan den cuadro di e Landspakket cu ta bay rekeri kizas otro prioridad pa aloca e fondo y e hende nan pa por implementa e reforma nan exitosamente.

Impacto di COVID19 tabata fuerte pa finansa publico
Na final e Director di Departamento di Finansa a duna un bista riba e impacto grandi cu COVID a causa riba Aruba su finansa publico.

Debe
Door di COVID e debe a subi grandemente cu 916 miyon florin di debe na Hulanda, cu ta hiba nos na un quota di debe di 108%, despues cu esaki tabata un 74,6% promer cu COVID. Hasta si Aruba logra surplus nan di +1.0%, esaki no lo ta suficiente pa cubri e pago di e prestamonan cu ta necesario den e añanan

venidero.

Saldo financiero
Promer cu COVID e saldo financiero tabata conoce un surplus di 3,8 miyon florin y awor esaki a bira un deficit di 534 miyon florin.

Sosten di likidez
Promer cu COVID, Aruba no tabata presta placa via Hulanda. Y awor pa por a wanta y surpasa e golpi financiero y economico, Aruba a fia 916 miyon florin di Hulanda.

Gasto di Interes
Aruba su gasto di interes tabata 229 miyon florin promer cu COVID y awor esaki a bira 243 miyon florin.

Gasto di personal
E gastonan di personal tabata na 475 miyon florin promer cu COVID y awor esaki ta 417 miyon florin.

Sosten financiero
Pa mantene e sistema social y pa retene cupo di trabou durante e pandemia di COVID, Gobierno a brinda 715 miyon florin di sosten financiero.

Presupuesto 2023
Na final sr. Werleman a splica tambe riba e cuadro financiero di Presupuesto 2023 cu a wordo prepara pa Conseho di Minister tuma decision riba dje. Una bes cu keda cla cu tur decision, e Presupuesto 2023 lo cuminsa cana e caminda pa wordo formalisa como Ley di Presupuesto 2023.

This site uses Akismet to reduce spam. Learn how your comment data is processed.

%d bloggers like this: