Belastingdienst ku mas atenshon pa kumplimentu di asesornan.

WILLEMSTAD – Riba djamars 6 di yüni 2022 Belastingdienst a entregá e reportahe di maneho di luna di aprel na minister di Finansa, Javier Silvania. E reportahe aki ta indiká ku ta sakando e aanslagnan di OZB atrasá i esaki ta kanando segun planifikashon. Esaki ta konta tambe pa e aanslagnan riba impuesto riba sueldo i benta. Ainda Belastingdienst ta keda konfrontá ku sierto retonan pa loke ta trata impuesto riba entrada (IB).
Aunke na desèmber 2021 a saka mayoria di e IB aanslagen di 2019 i resientemente un parti di 2020, ainda mester prosesá un parti grandi di e deklarashonnan na man. Di un banda esaki ta debí na e echo ku e kontribuyente tin biaha ta yena informashon robes òf inkompleto i di otro banda paso Belastingdienst ainda mester hasi algun adaptashon na e sistema, pa por hasi e proseso di IB aanslag mas efisiente. Riba término kòrtiku lo saka diferente aanslag balotá (taxatief) pa e kontribuyentenan ku ainda no a entregá nan deklarashon di IB pa e añanan 2017 te ku 2020. Un súplika ta bai na e kontribuyentenan ku no a hasi esaki ainda, pa entregá nan deklarashonnan di IB pa evitá un bishita di deurwaarder. E reportahe ta indiká tambe ku resientemente a aselerá e proseso pa kaba ku e bezwaarschriften ku tin pendiente, mirando ku den luna di aprel e kantidat di bezwaarschriften a sigui subi.
Pa loke ta trata kobransa di e impuestonan atrasá a kuminsá ku un ronda nobo di notifikashon di dwangschrift dor di deurwaarders. Banda di esei ta bai bira mas estrikto ku e medidanan di kobransa mirando ku e beslagopdrachten ta oumentando. Dado kaso e kontribuyente no tuma akshon despues di a risibí un dwangschrift, e chèns ta grandi ku e deurwaarder lo pone beslag pronto.
Belastingdienst ta dediká atenshon en partikular na belastingadviseurs i kantornan di accountant i atministrashon (asesornan). Nan tin un funshon di ehèmpel, i p’esei mester por eksigí di nan ku nan ta kumpli ku nan obligashonnan fiskal. Ta investigá tantu e obligashonnan pa loke ta trata entrega di deklarashonnan komo e pago di e deklarashonnan. Si resultá ku strukturalmente nan no ta kumpli, e inspektor tin e derechi pa stòp di aseptá e asesor konserní komo apoderadó na nòmber di e klientenan. Den un kaso asina, e asesor mester kumpli ku su debernan fiskal i drenta den un akuerdo ku ontvanger promé ku e por kontinuá komo asesor. Den kasonan ekstremo por embolbí e TIO-team di SBAB i por entamá un kaso kontra e asesornan konserní.
Aktualmente tin 4 asesor ku a keda anunsiá serka Officier van Justitie. Belastingdienst i Sektor di Fiscale zaken huntu ku Vereniging van Antilliaanse Belastingadviseurs (VAB) a traha un (konsepto) di un kódigo di kondukta pa asesornan. E kódigo di kondukta aki ta duna e inspektor fondo adishonal pa por nenga e asesornan si nan no aktua konforme lei. Keda sin entregá deklarashon na tempu, yena deklarashon robes òf inkompleto ta aktonan kastigabel segun art. 49 lid 1a di e Algemene Landsverordening Landsbelastingen. Banda di e echo ku ta poniendo mas preshon riba e medidanan di kobransa riba impuestonan atrasá, no ta ekskluí persekushon penal den kasonan ekstremo. Ta konsehá tur kontribuyente pa entregá e deklarashonnan atrasá i si ta nesesario drenta un akuerdo di pago ku Ontvanger.

This site uses Akismet to reduce spam. Learn how your comment data is processed.

%d bloggers like this: