Carlos Bislip ta bek cu su Drum Set & Percussion Camp

Si bo yiu ta gusta musica y tambe toca instrumentonan di ritmo, aki ta bo oportunidad.

Carlos Bislip a comparti detaye di su proximo proyecto pa e aña’ki cu ta e Drum Set & Percussion Camp 2022.

Carlos a comenta cu na aña 2009 el a organisa e prome Drum Camp cu dos obhetivo.

E prome tabata pa introduci na e comunidad y e hobennan di Aruba cu e mundo di percussion ta uno hopi amplio anto cu ta encera varios instrumento ademas di Drum Set, Conga y Timbal.

E segundo obhetivo tabata pa demostra cu ora cu ta tuma instruccion di musica di un manera intensivo, esta 3 ora pa dia 5 pa siman, pa 4 siman, e participantenan lo siña masha hopi mes.

Carlos a comparti cu ademas di a logra e dos metanan aki, tabata tin varios otro factor cu a bin na superficie cu ta di balor agrega na e crecemento di e participantenan.

Carlos a ripara cu e muchanan a siña “Problem Solving Skills”; e abilidad di resolve problema, colabora – esta traha hunto cu otro y tambe capta e informacion musical mas liher cu e otro muchanan. Nan a cuminsa demonstra cualidadnan manera “Peer Mentoring” – esta guia otro den e proceso di siñamento.

Carlos a menciona cu e ta wak e Drum Camp manera un oportunidad pa e siña e participantenan un poco mas di e mundo amplio di percussion unda nan ta siña e fundamentonan di entre otro Drum Set, Percussion Latina (Congas, Timbal, Guiro, Guira, Wiri) Snare Drum y ‘Multi Pitch Reading’. Pero tambe e ta wak e Drum Camp como un manera pa recruit of descubri posibel talentonan nobo.

Nos a puntra Carlos di ki otro manera e Drum Camp ta contribui na e panorama musical di Aruba. “Wel, ora ta trata di un “Forma di Arte” e desaroyo ta tuma su tempo pa asina ta efectivo den un comunidad of sociedad. Prome ta e introduccion di e arte den forma di les, despues ta logra e nivel y e dominio di e arte, anto finalmente e aplicacion di esaki den e cultura of e folklore di e comunidad”.

Carlos a comenta cu a traves di e añanan varios di e participante di e diferente edicion di e “Drum Camps” a sigui desaroya nan mes anto resalta den e mundo musical aki na Aruba. Tambe algun di nan a tuma e decision pa studia musica den exterior como percusionista. Algun ehempel ta: Lidrick Solognier, Siegfried Hart, Chris Rodulfo. E aña’ki Stephen Diaz y Denzil Tromp tambe ta bay studia den exterior.

Banda di esaki, Carlos a comenta cu a traves di e añanan el a ripara cu su alumnonan cu ta resalta a forma un nucleo di percusionista cu ta busca pa artista y gruponan cu sa participa den festivalnan local.

Ta puntra nan pa toca como nucleo door cu nan conoce e ritmonan y tambe door cu nan por lesa musica; anto cu esaki ta haci e ensayonan ta cana mas facil, loke ta cu ta refleha nan profesionalismo.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: