Piezanan unico pa Cas Dundun Ecury

Un spiel original di famia Ecury, decora cu cherubin (angel di sabiduria) y Apollo (dios Griego), cu a forma parti di e interior di casnan di famia Ecury ta bolbe MANA.   E ta ser compaña pa un stoel estilo emperador Luis XVI, tambe di fin di siglo 19.  

 

Mueblenan Frances di fin di siglo 19 di nivel halto tabata ser importa na Aruba y tabata simbolo di e status social di e ‘shonnan’. Un status di grandesa cu tambe ta complementa e detayenan arkitectonico pafor di e edificionan monumental Ecury. 

 

E dos artefactonan menciona lo forma parti di e exposicion den desaroyo  “Spirito di Tempo”, proyecta pa habri den 2023.  Spirito di Tempo ta ilustra e elegancia y forma di biba di e comerciantenan rond di decada 20-30 di siglo pasa y lo contene piezanan unico cu ta ilustra e estilo di bida den “cas di shonnan” (stads villas) na Playa. E exposicion aki lo ser instala den e edificio central di e compleho Ecury, un mansion cu a ser construi na 1929 pa Dada Picus. 

 

Akiden lo reubica e entrada principal pa MANA (Museo Arqueologico Nacional Aruba).

Pa varios generacion e spiel a forma parti di e bida diario den e monumentonan Ecury.  E stoel tabata forma parti di e mueblenan original di Miraflor, un otro mansion construi pa Dada Picus bou encargo di Famia Arends Lacle. E artefactonan aki a pasa den diferente man di colecionistanan durante decadanan. Nan a reconoce e balor cultural historico y ta orguyoso di por contribui na traspasa y expone herencia cultural di Aruba.  

 

Ademas di e spiel y stoel mahestuoso indica, lo incorpora den “Spirito di Tempo” varios otro piesa spectacular cu a sali for di diferente coleccion priva y nacional. Piezanan antiguo ta trece posibilidad y inspiracion pa coleccionistanan y creadornan artistico. MANA ta reconoce y gradici UNOCA y Prins Bernard Cultuurfonds Caribisch Gebied pa nan contribucion pa por a adkiri e dos piezanan unico pa comunidad y bishitanten tambe por disfruta di nan. 

Share this page to Telegram

This site uses Akismet to reduce spam. Learn how your comment data is processed.

%d bloggers like this: