Garashi lokal ta risibí lisensia di e marka mundial Bosch 

 

WILLEMSTAD – Djasabra 14 di Ougùstùs a tuma lugá apertura ofisial di Bosch Car Service Curaçao. Despues di un periodo largu di negosiashonnan i aktividatnan pa kumpli ku norma – i eksigensianan di e marka mundial Bosch, e garashi lokal por kuminsá operá awor komo Bosch Car Service.  

Bosch tin operashon den mas ku 150 pais rònt mundu i tin mas ku 15.000 empresa ku ta operá bou di e marka. Banda di mantenshon i reparashon di vehíkulonan, e empresa lokal alabes lo bende piesa di outo di marka Bosch. E invershonistanan lokal a invitá diferente persona pa e evento di inougurashon. Tambe tabata presente komo invitadonan internashonal, Layne Bozelli, di Bosch Brazil i Poulo Barcellos di Bosch Panamá. E últimonan aki a haña enkargo di e empresa mama pa firma un kontrato i alabes entregá di un sertifikado na e empresa lokal. 

Entre esnan presente tabatin alabes Minister President, Gilmar Pisas, Minister pa Desaroyo Ekonómiko i Turismo, Ruisandro Cijntje, Minister pa VVRP, Charles Cooper en Minister pa Desaroyo Sosial, Labor i Bienestar, Ruthmilda Larmonie. E último a ekspresá su satisfakshon durante di su diskurso ku un grupo mas di invershonista lokal a mustra nan konfiansa den nos pais i a duna nan aporte na desaroyo ekonómiko di Korsou kreando alabes kupo di trabou. Prinsipalmente na hóbennan ku ta risibí preparashon i training pa sigui desaroyá nan talento i konosementu i traha komo téknikonan Bosch.