Minister Javier Silvania Indeksashon di penshon di APC

E indeksashon di e derechi riba penshon i e penshunnan di Algemeen Pensioenfonds Curaçao (APC) ta reglá den artíkulo 30 di pensioenlandsverordening overheidsdienaren.

Sigun artíkulo 30 di pensioenlandsverordening overheidsdienaren, indeksashon di penshon di APC ta konektá na indeksashon di salario di ámtenarnan i na e posishon di kapital di APC. Den e artíkulo tin reglá ku den kaso i asina leu ku e kompensashon di trahadónan di gobièrnu kambia pa motibu di un subida di kosto di bida, e penshon di APC tambe lo subi konforme e subida di trahadónan di gobièrnu. E subida aki ta tuma lugá entrante 1 yanüari di e aña di kalènder ku e subida ta relatá na dje.

Den kaso ku e kapital di APC no ta karga e subida aki, e gerente di APC por skohe pa laga e subi atras parsialmente òf kompletamente. E punto di salida ta ku e grado di kobertura despues di indeksashon no ta mas abou ku 105% pa e indeksashon parsial i no ta ménos ku 115% pa e indeksashon kompletu. Na un grado di kobertura di mas ku 105% te ku 115%, por konsiderá un indeksashon parsial. Na un grado di kobertura mas haltu ku 115% por konsiderá un indeksashon di 100%.

Manera ya a bini dilanti, indeksashon di penshon di APC ta mará na indeksashon di salario di ámtenarnan. Segun palabrashonnan hasí den Konseho di Minister di Reino, for di 2020 a introdusí un rekorte riba kompensashon di trahadónan den sektor (semi) públiko ku 12.5% den antisipashon riba entrada na vigor di Landsverordening Normering Topinkomens. Pa por alkansá e rekorte di 12.5%, a pone entre otro un paro riba indeksashon di salario di empleado den e sektor (semi) públiko.

Den e Konseho di Minister di Reino di 22 di yüni 2022, a disidí ku ta permisibel pa Kòrsou baha e rekorte di 12.5%, bou di kondishonnan. Un di e kondishonnan ta, ku e bahada di e rekorte por tuma lugá despues ku Kòrsou aseptá e Landsverordening Normering Topinkomens di akuerdo ku desishonnan di Konseho di Minister di Reino anto e lei aki drenta na vigor riba e término di mas kòrtiku posibel. Pa motibu ku e paro na indeksashon di kompensashon ta parti di e rekorte di 12.5%, e Landsverordening Normering Topinkomens mester drenta na vigor pa indeksashon di salarionan di trahadónan den sektor (semi) públiko por tuma lugá atrobe. Despues di esaki, konforme artíkulo 30 di pensioenlandsverordening overheidsdienaren, lo por indeksá penshon di APC tambe atrobe.

Minister di Finansa ta di opinion ku ya ta tempu pa ámtenarnan ku a baha ku penshon i ámtenarnan aktivo haña lokual nan tin derechi riba dje, esta nan penshon òf salario kompletu, basta finansa publiko of grado di kobertura di APC ta pèrmití. Den e kuadro aki, e petishon ta pa Parlamento, despues di hasi adaptashon, trata e Landsverordening Normering Topinkomens mas pronto ku ta posibel.