Minister Dangui Oduber CONTINUACION DI E PROYECTO BABY BEACH WATERFRONT PROMENADE

ORANJESTAD – Diahuebs mainta Minister di Turismo y Salud Publico Sr. Dangui Oduber conhuntamento cu CEO di ATA Sra. Ronella Croes y tambe director di DOW Sr. Marlon Croes a duna un update tocante e continuacion di e proyecto Baby Beach Waterfront Promenade, cual ta parti di e master plan cu tin pa Sero Colorado. E proyectonan aki ta bay eleva henter e area rond di e playanan aki teniendo na cuenta e importancia di conserva nos naturalesa, creando asina un desaroyo di embeyesimento di e area na un manera sostenibel. 

 

E continuacion di e proyecto ta inclui diferente aspecto. Entre otro Baby Beach lo haya un area di parkeo completamente nobo y un retonde nobo, cual tambe ta parti di e plan aki.  Consecutivamente lo bay pone dos kiosko caminda hende por bay cumpra cuminda y/of bebida y tambe lo tin bañonan publico pa tur bishitante. Lo percura tambe pa drecha e canchanan di tennis pa tin un area deportivo multifunctional.  E meta ta pa e kiosko nan aki refleha e cultura Arubano y bende cuminda nan cu ta tipico den e area di Caribe. 

Tambe ta bay bin facilidadnan caminda por practica “beachsport” manera beach tennis y beach volleyball. Minister Oduber a crea un comision di proyecto infrastructural di turismo cu ta keda lidera pa Ministerio di Turismo. E comision aki lo bay traha mas di serca cu DIP pa asina e maneho cu a keda crea pa cu e beachnan wordo implementa. E desaroyo aki ta uno sostenibel anto pesey a dicidi tambe cu den e proyecto aki lo bay planta hopi palma di coco pa crea sombra pa asina limita e contruccion di palapa ariba e beach.

 

Minister Oduber tambe a recorda pueblo cu den cuadro di e proyecto aki, bestek ta available caba pa cumpra na DOW pa 350 florin. Dia 31 di Augustus DOW lo duna mas informacion specifico tocante e scope di e proyecto aki y consecuentemente e destaho publico lo tuma lugar dia 9 di September na DOW.


Turismo ta e driver di nos economia y pesei su desaroyo ta keda un prioridad. E gobierno aki ta para pa turismo di calidad, e turista cu ta bin pa calidad y pa contrubui na nos economia. Pesey ta hopi importante pa sigui inverti den e poducto Aruba. E proyectonan aki ta bay trece mas actividad pa San Nicolas pa asina percura cu e turista ta bin San Nicolas pa crea mas actividadnan economico. San Nicolas tin tur e potencial pa haya su fair share den e desaroyo di nos pais. 

 

Minister Oduber ta convenci cu e proyecto aki lo fungi como katalysator pa tur otro proyecto di sector priva cu lo sigui den e area aki. E proyecto aki ta posibel danki na un bon teamwork y cooperacion entre ministerio di turismo, ATA, DOW y DIP. Sigur un proyecto importante pa e area di seroe colorado cu tambe ta haya su desaroyo.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: