ROTONDE PALM BEACH DEN FINALISACION PERO HABRI PA COMUNIDAD
Premier Evelyn Wever – Croes:
ROTONDE PALM BEACH DEN FINALISACION PERO HABRI PA COMUNIDAD
ORANJESTAD – Fin di siman comunidad cu ta haci uzo di e area di Palm Beach por a experiencia mehoracion den e situacion di trafico. E rotonde di Palm Beach a wordo habri pa trafico por haci uzo di dje. E trabounan lo finalisa fin di luna,l pero ja caba e rotonde ta habri pa trafico di ambos direccion haci uzo di dje. Cu e rotonde completa, ta logra trece mas alivio den trafico den e area y specialmente trece seguridad den trafico.
Prome cu a tuma e decision pa construi un rotonde na e area aki, tabatin un crusada grandi cu tabata hopi insigur. Ta spera cu ciudadanonan cu ta frecuente e area awor por sinti e alivio y ta contento cu esaki, Prome Minister Evelyn Wever – Croes a expresa.
Prome Minister alabes a informa cu siguientemente lo drecha e camindanan dilanti hotelnan den area ‘highrise’. E trabou aki ta inclui den presupuesto pa otro aña pues manera cu presupuesto pasa, e fondonan lo ta disponibel pa por wordo uza. Den cuadro di esaki, preparacionnan ta bay cuminsa pronto, incluyendo dialogo cu stakeholders den e area, pa asina trece alivio den e area ey tambe.
Marlon Croes Director DOW
Director di DOW a splica cu e crusada cu tabatin antes tabata un punto debil den Aruba su infrastructura. Prome cu a cuminsa cu construccion di e rotonde, a pone plataforma na e sitio como solucion temporal. Awo cu e rotonde ta cla e ‘lane’ parti paden lo wordo cera pa e contratistanan su empleadonan por traha na un manera sigur riba e parti memey di e rotonde y pa 23 di september e proyecto lo ta definitivamente cla.
Gobierno su prioridad ta pa e careternan ta sigur y pa aumenta comfortabilidad den bida di cada ciudadano. Ta gradici e contratista cu ta Arubaanse Wegenbouw Maatschappij cu a traha duro hunto cu ekipo di DOW pa realisa e proyecto.
