LO TRECE AYO ROCK FORMATION BEK DEN SU GLORIA ORIGINAL
Prome Minister Evelyn Wever – Croes:
Prome Minister ta reuni cu famia Kelly en conexion cu terenonan rond di Ayo
LO TRECE AYO ROCK FORMATION BEK DEN SU GLORIA ORIGINAL
ORANJESTAD — Diaranson 14 di September, Prome Minister Evelyn Wever-Croes a reuni cu Famia Kelly cu ta doño di algun tereno rond di Ayo Rock Formation. Presente den e reunion tawata tambe DOW y DIP.
Gobierno di Aruba ya pa algun tempo, a tuma e decision pa reestablece e Sero di Ayo, Ayo Rock Formation na su gloria original. Un area cu tin hopi caracteristica positivo. Nos conoce e area aki pa e Barancanan di Ayo. Pero tambe e tin e historia hopi interesante di e tempo di e indjannan. Antes, e area specifico aki tawata un Hardin Botanico teniendo un tera hopi fertil rond di e Sero di Ayo.
Intension ta pa trece Ayo bek na su forma original y hacie un actraccion mas grandi pa local y turista como tambe pa brinda informacion di e historia di Ayo pa tur ciudadano di nos pais por conoce esaki y pa nos bishitantenan tambe haya e conocemento di nos bunita y interesante historia di Ayo.
Famia Kelly ta doño di e propiedadnan rond di e sero di Ayo. Gobierno a reuni cu e representantenan di e famia pa mira con pa yega na un acuerdo pa asina por haci e area mas bunita y atractivo pa cada ciudadano di nos pais por ta orguyoso. Mientras ta duna tambe reconocemento y honor na famia Kelly.
“Nos tawata tin un bon reunion y lo continua cu e reunionnan y pronto nos lo publica y divulga e plannan cu tin pa trece Ayo bek den su gloria original pa e bira un hoya, un orguyo pa tur Arubiano”, Prome Minister Evelyn Wever-Croes a expresa.
