SEKTOR TURÍSTIKO REKUPERANDO POSITIVAMENTE DESPUES DI PANDEMIA

MINISTERIO KONSERNÍ DESAROYO EKONÓMIKO

 

SEKTOR TURÍSTIKO REKUPERANDO POSITIVAMENTE DESPUES DI PANDEMIA

PUBLIKÁ RIBA 25 ÒKTOBER 2022

Willemstad- Partnernan den sektor turístiko a bini huntu djamars, 25 di òktober último pa duna un bista di e desaroyonan turístiko na Kòrsou durante e promé tres (3) kuartal di e aña akí i un proyekshon pa e último kuartal di  aña 2022. Presente na e konferensha di prensa akí tabata Minister di Desaroyo Ekonómiko, sr. Ruisandro Cijntje huntu ku representantenan di su ministerio, Ofisina di Turismo di Kòrsou (CTB), Curaçao Hospitality & Tourism Association (CHATA) i Curaçao Ports Authority. Apesar di e retonan ku nos sektor turístiko a bin ta enfrentá durante e último dos (2) añanan komo konsekuensia di e efektonan di COVID-19, e sektor ta mira ku satisfakshon señalnan di rekuperashon serka e diferente partnernan den e kadena turístiko na  Kòrsou.

Muryad de Bruin (Curaçao Tourist Board)

CTB a indiká durante di e konferensha di prensa  ku den e promé 9 lunanan di aña 2022, Kòrsou ya a risibí un total di 355.662 turista di estadia; kual ta un rekuperashon di 103% kompará ku e mesun periodo akí na aña 2019. Si e situashon aktual permanesé te ku fin di 2022, Kòrsou lo por registrá un kantidat rèkòrt di turista di estadia e aña akí. En total e turistanan di estadia a keda 3.4 mion anochi e aña akí kual ta un rekuperashon di 111% kompará ku e mesun periodo akí na 2019.
Pa yuda den e promoshon di Kòrsou, CTB a partisipá durante e 9 lunanan tras di lomba huntu ku partnernan den sektor privá na diferente ‘tradeshow’ den merkadonan di enfoke. Tambe a organisá ‘roadshows’ edukashonal dirigí riba agentenan di biahe i operadornan di tour i a ehekutá akuerdonan di promoshon ku aerolíneanan. Tambe, un total di 359 periodista i ‘influencer’ internashonal a bishitá nos pais durante e periodo tras di lomba, partisipando na trepnan edukashonal i konosiendo Kòrsou.
Informashon di Forwardkeys (un kompania internashonal ku ta hasi análisis i proyekshon di sifranan di turismo), ku CTB ta dispone di dje, ta mustra ku e region di Karibe ta e úniko region ku lo mira un kresementu di bishitantenan internashonal (15%) pa e di 4 kuartal di 2022. Aparte di esaki, Kòrsou ta den vários tòp por ehèmpel na Estádos Unídos i Colombia komo un di e destinashonnan den Karibe ku ta profilá mihó.

Hans Slier (Curaçao Hospitality & Tourism Association)

Pa loke ta trata desaroyonan hotelero, CHATA a indiká ku den e di tres kuartal di e aña akí Kòrsou a konosé un okupashon di hotèl di 70,2%. Kompará ku aña 2021, esaki tabata un oumento di 0.1% i  asta un oumento di 0.6% si nos kompará esaki ku sifranan promé ku e periodo di COVID-19. Mas aleu, e tarifa promedio diario (ADR) tambe a konosé un oumento di 17,3% den e di tres kuartal di 2022 kompará ku e promedio  den e mesun periodo akí na aña 2021. Asta kompará ku sifranan di 2019, pues promé ku e pandemia, esaki ta mustra un kresementu di 34,7%. Pa loke ta trata e entradanan pa kamber disponibel (RevPAR), CHATA a nota un oumento di 19,2% kompará ku e di tres kuartal di 2021. E entradanan a subi for di $116,37 na aña 2021 pa $138,75 den promé kuartal di 2022. Ku  kompará datonan promé ku COVID, e entradanan pa kamber disponibel ta mustra un oumento di 35,3%.

Sem Ayoubi (Curaçao Ports Authority )

Den e promé 9 lunanan di 2022, Kòrsou a yama bon biní na un total di 184 barku krusero kual ta representá un oumento di 582% en komparashon ku aña 2021. E barkunan krusero akí a trese un total di 315,296 pasahero lokual tambe ta un oumento di 924% kompará ku aña 2021. Gran parti di e kresementu akí ta debí na un subida den ‘cruise calls’ pero tambe subida den e okupashon di diferente barkunan krusero; den algun kaso alkansando un okupashon total di mas ku 90%. Mester tene kuenta tambe, ku na aña 2021 tabatin aktividatnan krusero solamente entre luna di yüni pa desèmber konsiderando e situashon ku protokòl i medidanan di COVID-19.  Proyekshonnan rònt mundu ta indiká, ku si akaso e kresementu kontinuá manera e ta aktualmente 2022 lo ta un transishon pa rekuperashon den e sektor miéntras e industria ta sigui ekspandé e kapasidat di barkunan i oumentá e nivel di okupashon abordo.

Zulaika Mook ( Ministerio di Desaroyo Ekonómiko)

Pa loke ta trata e impakto ekonómiko di e sektor di turismo, MEO a konkluí ku esaki tabata sumamente positivo. Esaki debí na e kresementu di tantu turismo di estadia komo turismo krusero den e periodo tras di lomba. Ta proyektá ku den e promé 9 lunanan di aña 2022 e sektor di turismo a generá un total di 1.934 mion florin pa nos ekonomia kompará ku 869 mion florin den e mesun periodo di 2021. Esaki ta un rekuperashon kompletu despues di pandemia te ku terser kuartal di aña aki kompará ku mesun temporada den aña 2019. Si turismo sigui krese manera ta wòrdu proyektá, MEO ta ferwagt ku e lo tin un kontribushon sumamente positivo riba Kòrsou su Produkto Interno Bruto pa aña 2022. MEO huntu ku CTB konhunto ku partnernan den sektor privá  ta trahando duru tambe pa prepará nos hendenan i yena e di kuponan di trabou ku a habri debí na e desaroyo positivo aki den e sektor di turismo.

Pa download e presentashon ku a keda kompartí durante e konferensha di prensa, klek aki

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: