UPB KU STRUKTURA I ORGANISASHON POLÍTIKO FUERTE PA REALISÁ METANAN DI BONEIRU

UPB KU STRUKTURA I ORGANISASHON POLÍTIKO FUERTE PA REALISÁ METANAN DI BONEIRU

 

Kralendijk – Union Patriótiko Boneriano ta konosí pa su forsa di organisashon. Último añanan komo resultado di elekshon 2019 UPB a bira un partido chikí i su forsa di organisashon tambe a keda limitá. Miéntras tantu UPB ta mira si, ku ningun otro partido no a krea un organisashon fuerte. Un organisashon fuerte ku ta sali defendé interesnan di Boneiru. Tampoko un organisashon fuerte ku kurason p’e hende ku mas ta sufri den e desaroyo di Boneiru.

 

Segun lider polítiko James Kroon: “Pa e elekshon benidero UPB kier ta un organisashon grandi atrobe. Un organisashon grandi i fuerte ku kurason pa hende. Tambe un organisashon grandi i fuerte ku lo sigui e lucha di derecho pa Boneiru i e suidadano di Boneiru dentro di Hulanda. Boneiru a stòp di lucha pa su derechonan. E situashon aki no por keda asina aki mas. Pues UPB ta lansa su mes un biaha mas pa bira un partido grandi na Boneiru. Nos mester di e forsa di votadónan bèk pa nos por sigui e lucha di Boneiru. Ta ku forsa grandi di votadónan nos por sigui e lucha i realisá benifisionan pa hende”.

 

“Di nos parti nos lo krea un organisashon fuerte bek pa UPB. E intenshon ta pa bini ku un grupo di guia (stuurgroep) di diferente hendenan ku ekspertisio. Entre otro hendenan ku ekspertisio di barionan i e hende den nesesidat, otronan ku ekspertisio di maneho, ekonomia i finansa. Tambe hendenan ku kapasidat pa planifiká i otronan ku kapasidat pa representá interesnan di Boneiru riba e tereno estatal i demokrasia. E grupo di guia (stuurgroep) lo konsistí di miembronan di Konseho Insular di UPB, lider polítiko di UPB, posibel diputadonan i otro personanan ku no nesesariamente ta bai riba lista polítiko di UPB. Un kos ta sigur tur persona di e grupo di guia (stuurgroep) lo ta dilanti di kortina i lo representá Boneiru i lucha na di un forma aktivo pa interesnan di Boneiru. E grupo di guia lo no ta pa kampaña polítiko so pero lo keda eksistí i profilá fuertemente despues di elekshon di mart 2023”, segun lider polítiko James Kroon.

 

“Ta di e forma aki den pasado UPB a yega na tur logronan pa Boneiru i su hendenan. Nos kier UPB su bon organisashon bèk riba pia pa lucha pa Boneiru. Pueblo lo disidí e ora ei si UPB ta

haña sosten grandi un biaha mas pa huntu nos sigui e lucha di derecho pa Boneiru i su hendenan”, segun Lider polítiko James Kroon.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: