Enkuesta di stakeholder di CBCS
Enkuesta di stakeholder di CBCS
WILLEMSTAD/PHILIPSBURG– Otro siman, Centrale Bank van Curaçao en Sint Maarten (CBCS) lo
start un enkuesta bou di su partidonan interesá. Esaki lo ta e di tres enkuesta ku CBCS ta realisá pa
haña sa opinion di su partidonan interesá relashoná ku e manera ku Banko ta kumpli ku su tarea i
tokante sierto desaroyo importante pa CBCS. Realisashon di e enkuesta ta den man di e buró REQuest.
E último enkuesta di stakeholder, realisá na 2020, a aportá diferente punto importante pa e agènda
stratégiko i aktividatnan di CBCS. Entre otro, e enkuesta a mustra riba e nesesidat di duna prioridat
na e problemanan struktural ku tabatin na Girobank i Ennia. E stakeholdernan a konsiderá ku tabata
importante pa duna atenshon urgente na e dos institutonan ku tabata den problema, pa asina
restorá konfiansa den e integridat di CBCS komo organisashon. Otro punto di atenshon ku a bini
padilanti tabata e nesesidat di mehorá Banko su plaso di respuesta i su komunikashon. Por último,
a pidi mas atenshon pa inovashon i mihó sistema di pago.
E enkuesta nobo akí lo mester indiká si tabatin kambio den CBCS su imágen komo organisashon i
kua ta e puntonan di atenshon nobo ku Banko Sentral su partidonan interesá na Kòrsou i Sint
Maarten ta konsiderá importante.
Ta mandando invitashon pa diferente grupo na Kòrsou i Sint Maarten, i partido interesá den
eksterior, entre otro, e institutonan supervisá, otro instituto supervisor, grupo di interes,
organisashon di gobièrnu, universidat i e medionan di komunikashon.
E datonan den e rapòrtnan di RE-Quest pa CBCS lo ser presentá solamente na nivel di grupo, pa
asina protegé anonimidat di e partidonan interesá, ya ku lo no por konektá e informashon ku niun
organisashon ni persona individual.
Unabes ku finalisá e enkuesta di stakeholder i analisá e hayasgonan, CBCS lo kompartí e
resultadonan ku públiko en general meskos ku a hasi ku e enkuesta anterior.
Willemstad, 28 di òktober 2022
CENTRALE BANK VAN CURAÇAO EN SINT MAARTEN