PRESENTASHON MASTERPLAN SER’I OTROBANDA NA MINISTER COOPER
PRESENTASHON MASTERPLAN SER’I OTROBANDA NA MINISTER COOPER
Willemstad – Djaweps último representantenan di Kaya Kaya BV i Fundashon Ser’i Otrobanda a presentá e Masterplan di Ser’i Otrobanda na Minister Charles Cooper, enkargá ku e.o. sektor di Planifikashon Urbano. Na inisio di aña a presentá e Masterplan aki tambe na Minister Ruisandro Cijntje, enkargá ku Desaroyo Ekonómiko i CTB. Ku sosten finansiero di e partnernan OBNA, Ennia, Landslotterij i NuCapital a duna enkargo na arkitekto Zarja Garmes pa traha e Masterplan. Despues di e presentashon a tene un kaminata den Ser’i Otrobanda pa mustra minister Cooper personalmente e deseonan ku tin menshoná den e Masterplan.
Fundashon Ser’i Otrobanda a bin ta traha pa basta aña den mehorashon di e bario. Esaki a krea tera fértil pa organisá e Festival Kaya Kaya ku tabata e chèri riba e bolo. Di e forma aki a pone Ser’i Otrobanda riba mapa i ta ser konsiderá komo un modelo pa barionan na Kòrsou. Esaki atraves di invershon i kambionan positivo ku ta tumando lugá riba e áreanan di e.o. infrastruktura, arte, músika pero tambe riba tereno ekonómiko i turístiko. Hende ta pará sentral den e Masterplan di kua ta embolbí prinsipalmente habitantenan di Ser’i Otrobanda i besindario den ehekushon di e diferente aktividat i eventonan ku ta organisá regularmente.
Despues di 2 aña di ousensia pa motibu di Pandemia a kontinuá ku ehekushon di e Masterplan, organisando e famoso Kaya Kaya Festival pa di 5 aña. Tantu minister Cooper komo minister Cijntje a komprometé nan mes pa duna e sosten i aporte nesesario den realisashon di e Masterplan aki. CTB ta un di e kofinansiadó di Kaya Kaya. Riba tereno di Planifikashon Urbano i infrastruktura tin diferente trabou i aktividat ku mester hasi di kua Minister Cooper a duna su palabra di lo duna e atenshon i kolaborashon nesesario di su sektor pa garantisá ehekushon di e Masterplan.
E masterplan ta un plan vishonario den kua ke krea un mihó konekshon i alabes subi kalidat di bida di habitantenan den e bario pero tambe pa fasilitá bishitante i turistanan. E.o. ke drecha tur trapi, traha un ‘loopbrug’ na Arubastraat pa rekonektá e dos partinan di e bario ku a separá. Tambe ke transformá e área bou di Julianabrug den un parke públiko, indiká rutanan di arte i krea un gimnasia den airu liber ku ta konosí na paisnan afó. Ademas di tur plan riba tereno di infrastruktura, ta sigui revitalisá e bario, hasié mas bèrdè, trese mas bibienda i duna mas tantu hende lokal chèns pa biba i traha den Ser’i Otrobanda.
Kòrsou ta selebrá su di 25 hubilario riba lista di Patrimonio Mundial di UNESCO. Atraves di Kaya Kaya i trabounan di FSO ta kuida, mantené i traha na bienestar di e bario pero tambe na nos sentro di siudat i henter Kòrsou i ta aportá na e rekonosementu aki.
Ademas di Minister Cooper tabata presente Kurt Schoop, Raygen Zuiverloon i Clayton Lasten, e 3 direktornan di Kaya Kaya BV, Arto Elstak miembro di direktiva di Fundashon Ser’i Otrobanda i arkitekto Zarja Garmes.
Athunto: diferente potrèt di presentashon Masterplan Ser’i Otrobanda na minister Cooper i di e kaminata den Ser’i Otrobanda pa haña splikashon di tur e plannan pa ku e bario.