MINISTER COOPER TA RISIBÍ MINISTER MARK HARBERS DI I&M HULANDA

MINISTERIO KONSERNÍ TRÁFIKO, TRANSPORTE I PLANIFIKASHON URBANO

 

MINISTER COOPER TA RISIBÍ MINISTER MARK HARBERS DI I&M HULANDA

PUBLIKÁ RIBA 13 DESÈMBER 2022

Willemstad – Riba djamars 13 di desèmber, Minister Charles Cooper a risibí su kolega Minister Mark Harbers di Ministerio di Infrastruktura i Maneho di Awa (I&M) di Hulanda na su despacho na Seru di Arrarat.

 

Meta di e kombersashon aki tabata pa interkambiá tokante e dos ouditorianan ku tin di tuma lugá den Reino Hulandes, esta unu di e Organisashon Internashonal di Aviashon Sivil (ICAO), i e otro di e Organisashon Internashonal Marítimo (IMO).

 

Pa loke ta trata ICAO, tin akshonnan ku huntu ku Hulanda, Kòrsou mester ehersé. Den 2023, Kòrsou lo tin di pasa den ouditorianan di tantu ICAO komo di e Federashon di Aviashon Merikano (FAA). Outoridat di Aviashon Sivil di Kòrsou lo mester tin sufisente hende kapasitá pa hasi esei.

 

Tambe tin un grupo di trabou ku ta atendé ku 7 tema di nabegashon áereo di Kòrsou. Kada tema tambe tin su mes grupo di trabou. Dos di e gruponan aki ta bou di guia di Kòrsou. Hulanda a pone un eksperto disponibel pa e dos gruponan aki.

 

Pa loke ta asuntunan marítimo, i e ouditoria di IMO, e ‘Koninkrijks Maritieme Administratie’ (KMA) a atendé ku diferente punto, i ta sigui ku ehekushon. Un punto importante ta Kòrsou tin su mes registrashon di barkunan. Tin intenshon pa pèrmití yatenan, ku ta mas ku 60 meter, registrá nan mes na Kòrsou. Di e forma aki, Kòrsou por ekspandé su registro di barku. Tambe ta trahando, na un manera spesífiko pa Kòrsou, riba un trayekto di lei i proseduranan marítimo, huntu ku KMA.

 

A probecha di e okashon, pa interkambiá tambe tokante e koperashon entre Hulanda i Servisio Meteorológiko Kòrsou pa loke ta Karibe Hulandes, esta islanan BES.

 

Por último, Minister Cooper a duna un splikashon tokante e asina yamá ‘Meerjaren Onderhouds Programma’ (MOP). Esaki ta un programa di termino largu pa mantenshon di nos kareteranan. Lo mester bini kambionan den nos sistema di impuesto di vehíkulo pa por finansiá e MOP. Kòrsou lo por rekurí na Hulanda mes pa e fondonan nesesario òf por aserká merkado lokal. Minister Harbers a mustra interes pa ku MOP aki i a pidi tur dokumentashon relevante.

 

Presente tambe na e reunion aki tabata Hefe di Kabinèt di Minister Cooper, Sra. Islelly Pikirie, Sekretario General di VVRP, Sr. Dwigno Puriel, Direktor di Sektor di Infrastruktura di VVRP, Sra. Caroline Manuel, Direktor General di Outoridat di Aviashon Sivil di Kòrsou, Sr. Peter Steinmetz, Direktor General di Mobilidat di Ministerio di I&M, Sr. Kees van der Burg, Direktor General di Direktorado di Aviashon i Asuntunan Marítimo di Ministerio di I&M, Sra. Ruth Clabbers, Sra. Marjan van Giezen, i Sra. Monique Faverey.

   

Share this page to Telegram

This site uses Akismet to reduce spam. Learn how your comment data is processed.

%d bloggers like this: