SEKRETARIONAN DI ESTADO TA BISHITÁ MINISTERIO DI HUSTISIA I ALGUN ORGANISASHON HUDISIAL

MINISTERIO KONSERNÍ HUSTISIA

 

SEKRETARIONAN DI ESTADO TA BISHITÁ MINISTERIO DI HUSTISIA I ALGUN ORGANISASHON HUDISIAL

PUBLIKÁ RIBA 23 DESÈMBER 2022

WILLEMSTAD – Resientemente Sekretarionan di Estado sr. Eric Van der Burg enkargá ku Hustisia i Seguridat i sra. Alexandra van Huffelen enkargá ku Relashonnan den Reino i Digitalisashon, i un delegashon di Hulanda tabata di bishita na Ministerio di Hustisia i tambe algun organisashon ku ta pertenesé na e kadena hudisial. Den e parti di mainta Sekretario di Estado sr. van der Burg a reuní huntu ku su delegashon ku Minister di Hustisia sr. Shalten Hato, kompañá pa algun miembro di su gabinete i staf ministerial den kua a trata diferente tópiko manera:

  • relashon entre trafikashon di hende ku sklabitut,
  • optimalisashon di e kadena ku a atendé ku imigrashon,
  • un sentro di detenshon nobo pa indokumentado (VODC),
  • unidat nobo pa kombatí trafikashon di hende,
  • formalisashon di ‘Actiecentrum Ondermijning Curacao’ (ACOC),
  • desaroyonan tokante posibel habrimentu di frontera ku Venezuela i
  • tambe algun proposishon di Minister Hato pa atendé mihó ku indokumentadonan ku ya kaba ta riba nos pais.

Ora a kaba di trata e diferente tópikonan, esnan presente a risibí un tremendo presentashon tokante Hostmanship di dos treiner di Hostmanship ku ta laborá na SDKK.

Seguidamente Sekretario di Estado sr. Van der Burg i su delegashon a bishitá Servisio di Atmishon kaminda nan a haña un presentashon di parti di sr. Ivan Wild di Kuerpo Polisial ku a splika e proseso pa yega na protokòl i e plan di akshon, i tambe efektonan positivo pa reforsá e vigilansia di frontera. Sekretario di Estado sr. Van der Burg a haña un bista tambe di e ofisina Falsidesk i splikashon kon esaki ta keda utilisá pa asina por detektá dokumentonan ku ta keda falsifiká.

Durante e kombersashon akí tabata presente e grupo di trabou ku ta representá i enkargá ku vigilansia di frontera sr. Ivan Wild, sr. Jules Olario i sr. Elbert Sambo di KPC, sr. Hans Trip di Marechaussee, sra. Clarelli Willems di Ministerio Públiko i por último sra. Daniella Victorina i Direktor di Sektor sr. Gerold Daantje di Ministerio di Hustisia.

Na final di e atardi Sekretario di Estado sr. Van der Burg huntu ku Sekretario di Estado sra. Van Huffelen a bishitá Vreemdeling Opvang en Detentie Centrum (VODC) na SDKK. E dos Sekretarionan di Estado a haña un rekorido i tambe splikashon di kon e proyekto ta kanando den su totalidat i a keda hopi satisfecho di loke nan a mira. Sekretario di Estado sra. Van Huffelen tabatin e oportunidat di sinta papia ku e grupo femenino ku ta detené den e instituto i a hunga un wega di “sjoemel” ku nan. Despues di esaki el a pasa serka e maskulinonan indokumentá pa papia amplio ku nan i tambe hunga futbòl ku nan.

Na e okashon akí tabata presente representantenan di Gerensia di SDKK, Ministerio di Hustisia i Vertegenwoordiging van Nederland in Willemstad (VNW).

Na final Sekretario di Estado sra. Van Huffelen a pidi pa ministerio, den kuadro di e proyektonan kofinansiá dor di Hulanda, kumpra artíkulonan di kushina i tambe a enkargá VNW suplente, pa sòru ku por haña bala nobo pa asina e indokumentadonan por hasi uso di esakinan miéntras nan ta den e instituto.

Share this page to Telegram

This site uses Akismet to reduce spam. Learn how your comment data is processed.

%d bloggers like this: