Bishita Real parti karibense di reino – programa

Bishita Real parti karibense di reino – programa

Di djabièrnè 27 di yanüari te ku djaweps 9 di febrüari Su Mahestat Rei, Su Mahestat Reina Máxima i su Altesa Real Prensès di Oranje ta hasi un bishita na e parti karibense di Reino. Nan lo bishitá konsekutivamente Boneiru, Aruba i Kòrsou. Despues nan ta sigui nan biahe pa Sint Maarten, Sint Eustatius i Saba. E bishita ta pa e Prensès di Oranje sera konosí ku e parti Karibense di Reino. E islanan a traha un programa kaminda kultura, naturalesa, pasado kolonial, esfuerso di defensa, deporte i enkuentro ku habitante ta pará sentral.

Zijne Majesteit de Koning, Hare Majesteit Koningin Maxima en Hare Koninklijke Hoogheid de Prinses van Oranje

E kompania Real ta keda kompañá pa sekretario di estado Van Huffelen di Relashonnan den Reino i Digitalisashon.

Boneiru, djabièrnè 27 i djasabra 28 di yanüari

Rei, Reina Máxima i e Prensès di Oranje ta yega Boneiru djabièrnè mèrdia, kaminda gezaghebber Edison Rijna ta saludá nan na airopuerto. Djasabra mainta gezaghebber ta risibí e kompania na e residensia ofisial, kaminda e miembronan di Konseho Insular i diputadonan ta presente.

Despues nan ta bishitá Witte Pan e kasnan di katibu, ku ta símbolo di e pasado di sklabitut di Boneiru. Kaba nan ta hasi un rekorido kantu di kosta wèst i ta bishitá Nos Zjilea den Cultural Park Mangazina di Rei, kaminda ta demonstrá e herensia kultural-históriko di Boneiru. Habitantenan di bario ta konta tokante nan bario, un famia di kuater generashon ta traha pan den un fòrnu di piedra antiguo i muchanan di skol básiko ta hasi un presentashon ku e ‘leerorkest’. Tambe nan ta mira un eksposishon tokante e historia di e isla. Despues tin un lùnch na Arawak ku habitante di Boneiru i nan ta kòmbersá tokante temanan aktual, manera kambio di klima, desaroyo di agrikultura i kombatimentu di pobresa.

Mèrdia ta sigui un bishita pa e laman di Sorobon, kaminda ta duna un demostrashon di windsurf. Boneiru ta konosí pa su bon posibilidatnan pa windsurf i e talentonan ku e ta trese. E Pareha Real i e Prensès di Oranje ta sigui pa un kombersashon ku Junior Rangers di Fundashon Parkenan Nashonal di Boneiru tokante konservashon di naturalesa di kosta. Ta trata prinsipalmente di palunan di mangel ku ta protehá e kosta. E kompania ta hasi un rekorido ku boto den bahia i e área di palu di mangel.

E bishita na Boneiru ta konkluí den Kralendijk ku un bishita na ‘Taste of Bonaire’, un marshe kultural ku produktonan lokal, gastronómiko i presentashonnan musikal.

Aruba, djaluna 30 di yanüari

Rei, Reina Máxima i e Prensès di Oranje ta yega djaluna mainta na Aruba, kaminda tin un seremonia di bon biní riba Wilhelminaplein. Despues di un kombersashon ku Gobernador Alfonso Boekhoudt, ta kana bai Parlamento pa un enkuentro ku lidernan di frakshon. Kaba nan ta kana bai Cocolishi, kaminda konseho di minister ta sinta. Aki tin un lùnch ku promé minister i e ministernan. Na kaminda públiko ta risibí nan i e ‘leerorkest’ i e koro hubenil ta presentá.

Mèrdia ta den kuadro di un bishita pa San Nicolas, un siudat ku un karakter artístiko. Ta duna un presentashon na Colegio Filomena tokante Boy Ecury, un héroe di resistensia arubano-hulandes. E presentashon ta na un ‘mural’ tokante Ecury. Durante e paseo den e siudat e muralnan kolorido tambe ta pará sentral. A krea e muralnan durante Aruba Art Fair, dor di artistanan internashonal i lokal. E kompania ta hasi un bishita tambe na e Museo di Industria i ta presensiá na final un presentashon riba kaya ku entre otro ‘breakdance’, ‘spoken word’ i un presentashon karnavalesko di hóben.

Aruba, djamars 31 di yanüari

Mainta e Pareha Real i e Prensès di Oranje ta hasi un bishita na Arikok National Park. E área protehá ta abarká 20% di Aruba. Nan ta hike den e parke, tin un enkuentro ku kreadónan di un pelíkula di naturalesa tokante seis islanan i ta papia den e sentro di kultivashon ku junior rangers tokante mantenshon i supervishon.

Despues ta sigui un bishita di kompania na Koninklijke Aruba Aloë, ku a establesé den 1890. E Pareha Real i Prensès di Oranje ta mira kon e kompania ta kultivá aloë vera i ta produsí produktonan di kuido i ta papia ku empleadonan.

Mèrdia nan ta bishitá e Universidat di Aruba. Nan ta presensiá un parti di un ‘hoorcollege’ tokante derecho karibense i ta papia ku studiante.

Despues Rei i e Prensès di Oranje ta hiba un bishita na akademia di futbòl den Compleho Deportivo Frans Figaroa. Hóbennan ku hopi talento ta haña entrenamentu di futbòl den koperashon ku KNVB.

Reina Máxima ta hiba un bishita na un kunukero di bèrdura, ku ta partisipante di e ‘business academy’ di dunadó di krédito Qredits.

Anochi tin e Bon Bini Festival na Fort Zoutman. Despues di un rekorido riba Plaza Padú, tin un presentashon di produktonan lokal i musikal. Tambe Rei, Reina Máxima i e Prensès ta asistí na un eksplorashon tokante kultura i historia di Aruba, ku músika i baile karibense.

Aruba/Kòrsou, djárason 1 di febrüari

E Pareha Real i e Prensès di Oranje ta nabegá di Aruba pa Kòrsou ku e barku di Marina Real Zr.Ms. Holland ku ta stashoná den Karibe. Na bordo tin un kombersashon tokante e esfuerso di Ministerio di Defensa den Karibe, siguí pa un rekorido riba e barku i demostrashon. Defensa ta duna aporte na seguridat den tur parti di Reino Hulandes. Den e parti karibense tin algun kazèrne pa por kumpli ku tres tarea prinsipal: protekshon di integridat di e teritorio, promoshon i mantenshon di órden hurídiko internashonal i sosten di outoridatnan lokal. Ehèmpel di esaki ta operashon kontra trafikashon di droga, sosten na akshonnan di reskate i yudansa di urgensia ora di orkan.

Na yegada den Bahia di Santa Ana di Willemstad Gobernador Lucille George-Wout ta saludá e kompania Real, siguí pa un seremonia di bon biní pa e bishita na Kòrsou.

Kòrsou, djaweps 2 di febrüari

Na Willemstad e bishita ta kuminsá ku un paseo riba Brùg Ponton pa Brionplein, kaminda Rei ta hasi apertura di inskripshon pa Weganan di Rei. Muchanan di skol di fundeshi (skol básiko) ta partisipá na weganan deportivo riba e plenchi. Despues ta hasi un bishita na e bario di Otrobanda. Durante di e rekorido ta papia ku habitante, artista i tin presentashon musikal. Ta sigui ku un lùnch ku outoridatnan di Kòrsou na Palasio di Gobernador.

Mèrdia e kompania Real ta bishitá e barionan di Punda i Scharloo. Den Punda Rei ta traha un moneda pa rekordá 25 aña di Willemstad komo siudat di Herensia Kultural di UNESCO. Tambe nan ta pinta un Chichi, un eskultura típiko di Kòrsou ku ta simbolisá e ruman muhé mayó responsabel den un famia. Despues nan ta sigui pa e bario di Scharloo, ku tin arte di kaya, músika i proyekto di deporte pa hóben. E rekorido ta terminá riba Brùg Prinses Amalia, kaminda e kompania ta skucha e Wals Amalia ku ta komponé spesialmente pa e Prensès.

Anochi tin un sena na Katheraal van Doornen, ku bintiun Yu di Kòrsou ku ta nifiká algu den komunidat. E kantidat di invitado ta símbolo pa 21 aña matrimonial di e Pareha Real riba e dia ei.

Kòrsou, djabièrnè 3 di febrüari

Mainta e kompania Real ta bishitá Landhuis Kenepa, e antiguo plantashi kaminda Tula a kuminsá ku e revolushon na 1795. Nan ta presensiá un presentashon tokante di e revolushon i ta papia ku desendientenan di esnan ku a hasi katibu. Despues ta sigui un bishita pa Hòfi Mango, ku tabata un plantashon di suku i ku awor ta un parke di naturalesa, kaminda awor a lanta entre otro un estudio di hofenir. 

Mèrdia Rei, Reina Máxima i e Prensès di Oranje ta presensiá un presentashon na e laman di Cas Abou di Sea Turtle Conservation i Dutch Caribbean Alliance (DCNA) tokante teritorio di laman protehá i konservashon di e poblashon di turtuga.

Pa terminá e bishita na Kòrsou anochi riba Brionplein kaminda tin un Konsierto di Tumba ku presentashon karnavalesko. Ta organisá e anochi na honor di defuntu Boy Dap, ku ta konsiderá é rei di Tumba. Tumba ta un estilo di baile i músika ku tin su orígen na Afrika.

Sint Maarten, djaluna 6 di febrüari

Na Sint Maarten Gobernador Ajamu Baly ta risibí Rei, Reina Máxima i e Prensès di Oranje na Princess Juliana International Airport. E promé dia di e bishita na Sint Maarten ta den kuadro di rekuperashon di e isla despues di e destrukshon di orkan Irma na sèptèmber 2017. E kompania ta bishitá aeropuerto ku aworakí ainda ta den rekonstrukshon. Tambe ta hasi un bishita na e servisionan di asistensia i emergensia kaminda e Pareha Real i e Prensès di Oranje ta asistí un entrenamentu di desaster. Despues nan ta bishitá SXM Medical Center. E hòspital aki tin un funshon hopi importante den region i ta trata tambe hopi pashènt di Sint Eustatius i Saba. E Pareha Real i e Prensès ta papia ku pashènt i ta haña informashon tokante e ekspanshon di e hòspital. Ta sigui despues pa un lùnch ku konseho di minister.

Mèrdia e kompania ta bishitá e ruta di mural Color Me SXM den Philipsburg. E muralnan aki tin komo meta pa hasi Philipsburg mas agradabel pa biba awor ku ainda tin hopi edifisio pará bashí òf ta destruí despues di e orkan. Pa terminá e dia Sint Maarten ta presentá su bida kultural durante di un paseo i ku un konsierto riba Boardwalk di Philipsburg.

Sint Maarten, djamars 7 di febrüari

E Pareha Real i e Prensès di Oranje ta bishitá Fort Amsterdam mainta. Akinan nan ta bai hasi un ekspedishon di para i ta bai buska e pelikan maron, e para nashonal di e isla. Tambe nan ta haña splikashon tokante historia di e fòrti. Kaba nan ta topa ku miembronan di Parlamento i Parlamento Hubenil di Sint Maarten. Na e fasilidat di bibienda White and Yellow Cross nan ta bishitá e pasadia di grandinan i persona ku desabilidat. Despues e kompania ta sigui pa un feria di siensia kaminda alumno di skol básiko i skol sekundario ta presentá nan solushon pa e problema di sushi di plèstik riba e isla

Mèrdia Rei, Reina Máksima i e Prensès di Oranje ta bishitá Recources for Community  Resilience (R4CR). Ku fondonan di Banko Mundial R4CR ta finansiá proyektonan dirigí riba rekonstrukshon di Sint Maarten despues di Irma. E kompania ta kòmbersá ku un hóben tokante nan trabou pa diferente organisashon. Despues ta sigui un bishita di e Pareha Real i e Prensès na un proyekto di kurá di skol, kaminda nan ta kòmbersá ku muchanan di skol tokante e trabou den kurá i tokante e importansia di traha ku mata riba nan salú mental. Den Emilio Wilson Park muchanan di skol ta konta tokante nan soño pa futuro di Sint Maarten i nan ta planta den presensia di e kompania un un ‘yellow sage’, e flor nashonal di e isla. Ta sigui un bishita di Rei, Reina Máksima i e Prensès di Oranje na Sint Peters Hill kaminda nan ta haña splikashon tokante konservashon di naturalesa di Sint Maarten. E seru aki ta pegá ku e parti franses di e isla. Ta sera e atardi ku wega di beisbòl di hóben.

Anochi e kompania ta bishitá Gobernador i ta topa diferente habitante di Sint Maarten.

Sint Eustatius, djárason 8 di febrüari

Komisario di gobièrnu Alida Francis ta risibí e kompania Real na Sint Eustatius i nan ta papia ku outoridatnan. Durante un paseo dor di e sentro históriko di Oranjestad nan ta topa ku diferente habitante di Sint Eustatius ku ta konta tokante di nan bida riba e isla. Tambe ta para ketu durante di e paseo riba e pasado di sklabitut. E Pareha Real i e Prensès di Oranje ta sigui pa un debate ku hóben kaminda ta elaborá riba futuro di hóben riba e isla.

Despues di un lùnch ku habitante di Sint Eustatius Rei, Reina Máxima i e Prensès di Oranje ta bishitá Zeelandia Beach kaminda nan ta haña splikashon tokante e mantenshon di naturalesa riba e isla i tokante e anual Beach Clean Up di Statia-doet. E kompania ta sigui despues pa un kurá di komunidat kaminda nan ta papia ku agrarionan tokante e suministro di kuminda na Sint Eustatius. Dor ku hopi kuminda ta importá preisnan ta haltu i tin un eskases di produkto fresku riba e isla. Kaba e kompania ta partisipá den un entrenamentu di basketbòl ku muchanan di skol. E bishita na Sint Eustatius ta terminá ku un manifestashon den Fort Oranje ku ta den kuadro di e herensia kultural di Sint Eustatius.

Saba, djaweps, 9 di febrüari

Ta klousurá e bishita na Saba. Gezaghèber Jonathan Johnson ta risibí Rei, Reina Máxima i e Prensès di Oranje i despues nan ta haña un splikashon di e suministro di energia na Saba. E meta di Saba ta pa durante e próksimo añanan pasa pa energia duradero (energieneutraal). Despues e pareha Real i e prensès di Oranje ta bishitá e pueblo di Zion’s Hill kaminda nan ta haña un splikashon di ‘kantklossen’. Esaki ta un tradishon na Saba i ta un téknika pa traha kanchi. Durante un kaminata den e pueblo di Windwardside e pareha Real i e Prensès di Oranje ta topa ku vários habitante. Lo presentá un obra teatral i artista i empresario ta konta di nan trabou. Tambe Rei, Reina Máxima i e Prensès di Oranje ta bishitá e museo di Harry L. Johnson kaminda nan ta haña splikashon di bida na Saba durante e añanan.

Despues di un lùnch ku e outoridatnan di Saba, nan ta bishitá e Expertise Education Center Saba na St. Johns. E sentro di edukashon aki ta duna sosten na alumnonan vulnerabel. Na 2021 e organisashon aki a gana un Appeltje van Oranje di e Fondo di Oranje. Despues e Pareha Real i e Prensès di Oranje ta sigui pa e haf kaminda nan ta haña un splikashon di e plannan di konstrukshon pa un haf nobo pa e isla. Mesora despues sientífikonan ta konta di e proyekto ku zeapel Diadema. E zeapelnan aki ta yuda restourá koral dor di kome lima ku ta tapa e koral. Por último Rei, Reina Máxima i e Prensès di Oranje ta bishitá e pueblo The Bottom kaminda na e kancha di Cruijff mas grandi na mundu, nan ta hasi deporte ku mucha.

Share this page to Telegram

This site uses Akismet to reduce spam. Learn how your comment data is processed.

%d bloggers like this: