Cardinals, Indians, Dodgers i Braves na bida den Lipo Elhage RBI 2022-2023

 

 

WILLEMSTAD – E kampionato di Lipo Elhage RBI 2022-2023 patrosiná pa MCB Bank a drenta buèlta kulminante ku e playoff di dòbel eliminashon. Despues di e fin di siman di vários wega awor a sobra 4 ekipo ku lo bataya pa e gran título di kampion di e temporada aki. Un fin di siman karga ku tenshon den vários wega ku tantu Marchena komo Dodgers na rant di eliminashon ku tog a logra di bin bek pa keda na bida den aktual kampionato. Marchena a kaba e promé buèlta na promé lugá i Dodgers ta e aktual kampionnan. Den e promé wega di dòbel eliminashon djasabra, Royal Scorpions Cardinals a gana Groot Kwartier Astros ku skor di 8-5. Picher ganador tabata Jordyan Henriquez i  Welton Lourens a resultá e picher pèrdèdó. Pa Cardinals, Lyendley v/h Kruis a bai di 2-2 ku un honron. Pa Astros, Whiashan Pieters a bai di 2-1. Despues Sta. Maria Padres a kai vensí na man di St. Michiel Dodgers ku skor di 7-3. Jamdrick Cornelia a gana pa Dodgers i Kevin José a bai di 3-2 na bate. Gyasi Isenia a pèrdè pa Padres miéntras ku Nathan Cijntje a bai di 1-1 na bate. Den e último wega di djasabra, Royal Scorpions a gana Marchena Braves 10-5 despues ku nan tabata atras 5-0 te den di 5 ining. Picher ganador tabata Jayverson Rellum mientras ku Quishanic Martis a resultá picher pèrdèdó. Pa Cardinals Lyendley v/h Kruis atrobe tabatin e bate kayente bayendo di 4-2.  Pa Braves, Deshandro Tromp a bai di 3-2.

Djadumingu tenshonnan tabata mas haltu ya ku algun ekipo tabata lomba kontra di muraya ku peliger di eliminashon. Den promé wega Sta. Rosa Indians a gana St. Michel Dodgers ku skor di 6-5. Pa Indians, Rodiensley Ignecia a resultá e picher ganador i dos bateadó a bai di 3-2. Jurion Reinaa resultá picher pèrdèdó pa Dodgers miéntras ku Shendrion Martinus a bai di 4-2 na bate i Kevin Jose tabatin un grandslam. Despues Marchena Braves a bin di atras pa gana di Sta. Maria Padres ku skor di 5-3 pa keda ku na bida den aktual kampionato. Ku e derota aki Padres a keda eliminá. Timothy Piar a resultá e picher ganador miéntras ku Dsean Wederfoord a pèrdè. Braves tabatin tres bateadó ku a bai di 3-1. Pa Padres,  Gensley Ryan a bai di 3-2. Den último wega di djadumingu, mester bisa den un wega bon bringa, Groot Kwartier Astros a keda den tereno i mester a wak St. Michel Dodgers skor tres kareda den nan último turno na bate. Ku e derota aki Astros a pèrdè na di dos wega di dòbel eliminashon i awor ta afó. Raydjen Rosina a tira 6 ining pa resultá e picher ganador pa Dodgers. Dos bateadó a bai di 2-1 pa Dodgers. Johaimry Balentina Gregorius a pèrdè pa Astros i Welton Lourens a bai di 3-2 na bate.

Ku e resultadonan aki Royal Scorpions Cardinals, Sta. Rosa Indians, St. Michiel Dodgers i Marchena Braves a sigui na bida den e buèlta di dòbel eliminashon aki. Den e 4 ekiponan aki ta Sta. Rosa Indians i Royal Scorpions cardinals no tin wega pèrdè i ta mihó. Playoff ta kontinuá djasabra awor den Tio Daou Ballpark ku un promé wega sumamente importante pa e aktual kampionato Lipo Elhage RBI 2022-2023. E dios ekiponan invikto ainda den e buelta di dòbel eliminashon ta topa otro, Cardinals i Indians. Ganador di e wega aki ta pasa pa final i lo mester gana un wega so pa bira kampion.

Tur wega ta tuma lugá na Tio Daou Ballpark. Kòrda ku weganan di lipo Elhage RBI Curaçao 2022 por keda sigui di forma digital via iScore i tambe semper por bishita e website http://www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook. E kampionato ta posibel danki na MCB, CBDF, KNBSB, MLB i Fundashon pa Nan.