Promé Minister sr. Gilmar Pisas ta tene entrevista un ekipo tékniko ku ta kondusí un estudio riba reforsá e ròl konsultivo di SER

 

 

Willemstad – Promé Minister sr. Gilmar Pisas huntu ku Minister di Desaroyo Sosial, Labor i Bienestar (SOAW) sra. Ruthmilda Larmonie-Cecilia a tene un entrevista ku un ekipo tékniko di Konseho Sosial Ekonomiko (SER) ku ta kondusí un estudio riba reforsá e ròl konsultivo di SER dia 17 di yanüari 2023.

 

Promé Minister sr. Pisas i Minister di Desaroyo Sosial, Labor i Bienestar (SOAW) sra. Larmorie-Cecilia a keda entrevistá dor di e ekipo tékniko di Konseho Sosial Ekonomiko (SER) riba un estudio ku aktualmente ta ser kondusí riba kon por reforsá e ròl konsultivo di SER.

E estudio ta ser hasí dor di un studiante di Haagse Hogeschool ku aktualmente ta koriendo stazje na SER i ku ta studiando atministrashon públiko i maneho gubernamental ku spesialisashon den relashonnan den Reino.

E stazjèr a kompañá e ekipo tékniko durante e enkuentro ku e dos mandatarionan.

 

E mottibu pa kual a disidí di hasi un estudio/investigashon riba ròl di SER, ta basá riba resultado di e revishon di e funshon legislativo na Kòrsou ku a ser realisá na novèmber 2021 dor di prof. Sjoerd Zijlstra, kende ta dosente ekstraordinario den Derechi Atministrativo i Estudionan Legislativo na Universidat di Kòrsou (UoC).

Prof. Zijlstra a konkluí den su revishon di e funshon legislativo ku SER, komo órgano konsultivo stratégiko, ta mihó sirbí den e fase di formulashon di maneho gubernamental i no den e fase kaminda proyektonan di lei i di reglamentunan ta kla kaba pa despues SER duna su opinion.

 

E ophetivo di e estudio, inisiá pa e ekipo tékniko di SER, ta pa desaroyá un strategia elaborá ku ta permití e órgano konsultivo aki tin un ròl mas prominente den e fase di desaroyo i formulashon di maneho gubernamental. Esaki lo por si pidi SER pa saka sierto estudionan i/o investigashonnan ku relevansia pa maneho gubernamental den un fase previo.

Pa medio di entrevistanan ku algun aktor importante den e proseso legislativo, ta kompilá ideanan, nesesidatnan i interesnan pa asina por haña un bista mas kla si ta deseabel i faktibel posishoná e funshon di asesor ku SER tin den e fase di formulashon di maneho gubernamental i no na final, ora proyektonan di lei i/o dekretonan gubernamental ta kla kaba.

 

Den e kuadro aki kombersashonnan i entrevistanan ta ser kondusí aktualmente ku ministerionan di Gobièrnu, mandatarionan, Direktorado di Lei i Kasonan Hurídiko (WJZ) i tambe ku otro órganonan di estado.

 

Promé Minister sr. Pisas i Minister di SOAW sra. Larmonie-Cicilia a kontestá den detaye preguntanan ku a ser hasí na nan, kompartiendo asina ei nan puntonan di bista ku a ser konsiderá sumamente interesante.

 

Tur entrevista lo ser kompilá dor di e ekipo tékniko di SER den un informe den kua rekomendashonnan konkreto lo ser hasí.

E resultadonan di e estudio aki lo ser presentá na Konseho di Ministernan na luna di febrüari próksimo, manera a keda palabrá durante e enkuentro ku e dos ministernan.

 

Riba potrèt: Promé Minister sr. Pisas, Minister Larmonie-Cicilia, Sekretaria di Konseho di Ministernan Sra. Balentin, Direktor/Sekretario General di SER sr. Henríquez, e stazjèr yùfrou Vrede i sra. Perquin, konsehero mayó na SER.

Share this page to Telegram

This site uses Akismet to reduce spam. Learn how your comment data is processed.

%d bloggers like this: