ππͺπ―πͺπ΄π΅π¦π³ ππ’π―π¨πΆπͺ ππ₯πΆπ£π¦π³ π πππ₯π π π¨π‘ π π’π¨ π£π π π£π₯π’π¬πππ§π’ ππ ππ πππ¬ππππ ππ‘π§π’ ππ π πππππ πππππ π¦π§π₯ππ£
ORANJESTAD β Dialuna mainta Minister di Turismo y Salud Publico sr. Dangui Oduber a haci un anuncio importante den cuadro di e mehoracion di nos producto Aruba. E biaha aki ta e proyecto di embeyecimento di e strip di Eagle Beach for di e retonde di Amsterdam Manor te cu e retonde di Alhambra. E proyecto aki ta bay wordo financia pa Tourism Product Enhancement Fund (TPEF) y Aruba Tourism Authority (ATA).
E proyecto aki ta un bunita proyecto caminda sector publico y sector priva ta bay traha cu otro. Sector publico ta bay haci e inversionnan y sector priva ta compromete nan mes pa haci e mantencionnan necesario den e aΓ±anan nos dilanti.
Dialuna anochi den un ceremonia Minister Oduber conhuntamente cu tur e General Managernan di e propiedadnan cu ta riba e strip cu ta bay ricibi e embeyecimento y president di e Board di TPEF sr. Mario Arends a firma un MOU caminda tur partido ta compromete nan mes cu otro.
E proyecto aki ta bay wordo realisa den 2 fase, e prome fase ta bay cuminsa den e dianan nos dilanti. Total sector publico ta bay inverti un suma significante den e proyecto aki y sector priva ta bay inverti den e mantencion di e proyecto. E modelo aki ta uno nobo y distinto cu ministerio di turismo a scohe pa traha cune pa laga sector priva tambe participa activamente den mantencion di diferente proyectonan. Esaki ta haci e proyecto aki uno unico y un bon modelo pa futuro. Ta muestra di cooperacion y trahando hunto por logra mas. Di e manera aki nos por garantisa cu e proyecto lo ta un duradero y lo eleva producto Aruba.
Den e proyecto aki ta bay embeyece henter e strip di Eagle Beach, lo bay percura pa uniforma e landscaping cu flora y piedranan blanco, pa henter e strip keda mas orginisa y mihor structura. E idea ta pa henter strip aparenta igual creando un sentimento mas agradabel pa nos bishitantenan. Tambe lo bay agrega mas bari di sushi riba e strip pa asina tin un mihor maneho di desperdicio den e area aki.
Finalmente Minister Dangui Oduber ta gradici e Board di TPEF, ATA y tur e General Managernan di e propiedadnan pa nan colaboracion cu e bunita proyecto aki cu sigur lo tin un balor agrega pa Aruba.
