DESPUES DI VÁRIOS AÑA, AÑA 2023 TA HABRI KÒRSOU KU UN RÈFRI RIBA LISTA DI FIFA!

E aña aki Kòrsou despues di 3 aña tin un rèfri riba lista di FIFA atrobe! Esaki despues di a haña e grato notisia ku Sr. Norberto Da Silva a subi lista di FIFA i ta nos úniko rèfri despues di basta tempu, ku ta elegibel pa dirigí partidonan internashonal tantu den eksterior komo aki na Kòrsou.

 

 

Sr. Norberto Da Silva ta un hóben di 38 aña di edat ku tin 2 aña formando parti di kuerpo di arbitrahe i ta aktuando na partidonan di Kampionato Hubenil i Liga MCB. Durante su promé aña komo rèfri el a keda nominá komo rèfri di aña. Tambe el a wòrdu skohe pa dirigí e ùltimo 2 finalnan Liga MCB Promé Divishon i a partisipá na diferente kurso kaminda e por a sigui desaroyá komo rèfri na aña 2022. Otro logro di Norberto tabata na momentu ku el a wòrdu invitá pa dirigí algun partido na ougùstùs último na Repúblika Dominikana kaminda ta tin un torneo internashonal di kategoria U-14 ku a konta ku partisipashon di diferente pais den Karibe. Aparte di e partidonan ku ela dirigí el a partisipá na diferente training ku instruktornan di FIFA ku tambe ta tei presente. E biahe aki tabata hopi informativo i edukativo kaminda el a konosé diferente rèfri ku instruktor di nos region i amplia su konosementu.

 

FFK ta sumamente kontentu i orguyoso ku e logro aki i a tene un entrevista chikí ku Norberto p’asina konosé un tiki mas di aserka i sera konosí ku su trayektoria komo árbitro.

 

Norberto a disidí di forma parti di kuerpo di arbitrahe paso e kier a duna un aporte na e deporte mirando ku semper el a gusta futbòl i tabata praktiká esaki komo hòbi. Ora el a inisiá ku esaki, el a ripará kuantu pashon e tin pa arbitrahe i segun e oportunidatnan a presentá, el a sigui krese i desaroyá ku hopi dedikashon i disiplina.

 

Awor ku el a subi lista di FIFA, esaki ta un stap mas den su karera di arbitrahe i e ta kontentu di por bolbe pone nòmber di Kòrsou riba mapa di FIFA pa loke ta trata arbitrahe. Pues esaki ta un oportunidat pa habri portanan pa esnan mas yòn ku tin potensial pa sigui krese, trese mas bista riba nan. E ta hopi orguyoso di e logro aki mirando su edat i ku tòg e por a yega akinan den apenas 2 aña. E ta spera di por ta un ehèmpel pa otronan i yudanan krese i sigui desaroyá riba e tereno aki pa halsa e nivel lokal.

 

Den futuro lo e ke sigui duna di su parti pa ku rèfri, sigui kue eksperiensia i invertí den su mes pa yega mas leu posibel pero disfrutando di e ‘journey’ ku e ta pasando aden.  E ta keda realista, tuma tur kos ‘paso a paso’, pasó niun hende no a siña kore sin siña gatia promé.

 

 

 

E mensahe ku e tin pa su koleganan ku ainda no ta riba lista pa diferente motibu ta; pa sigui traha riba bo mes, sigui train, duna di bo parti i ku tempu e kosnan lo yega. No dependé solamente di FFK òf otronan pero invertí den bo mes. Esei por ta na e manera di mas simpel, dor di djis kumisá evitá sierto alimento, kambio di rutinanan den bida i train mas konstant. Repasá bo reglanan regularmente ya ora bo ta riba vèlt bo ta bon ekipá físikamente i ku konosementu di regla.

 

Su mensahe na tur esnan ku ta duda ainda pa bira rèfri ta ku e ta un karera hopi apart ku tin su desafionan pero na e otro banda e ta yudabu ku kresementu personal i bo ta aportá positivamente ku e deporte rei i ku bo pais. Den tur deporte òf kosnan den bida tin su desafionan aki aya, pero e arte ta pa pasa ‘over’ di nan i siña di tur e kosnan ei. Di tur hende bo por siña algu ku bo por hinka den bo tas di konosementu i eksperiensia. Kòrda ku tempu ta pasa lihé i kon ku bai bin mas yòn bo kumisá, mas lihé bo por yega leu. Disiplina propio ta un ‘tool’ hopi importante riba tur tereno, esei ta meskos ku arbitrahe.

 

Palabranan sabio pa inspirá i animá tur ku tin ambishon pa yega leu den abitrhae aki na Kòrsou.

Un biaha mas FFK i Departamentu di arbitrahe ta felistá Norberto Da Silva pa e logro aki i ta deseá Norberto hopi éksito pa futuro!

 

23 yanüari 2023

 

Norberto Da Silva (di 3 riba e imáhen) durante final di Liga MCB Promé Divishon

 

Norberto Da Silva (di 3 riba e imáhen) durante su aktuashon na Repúblika Dominikana

Share this page to Telegram

This site uses Akismet to reduce spam. Learn how your comment data is processed.

%d bloggers like this: