Reunion di Kolegio di Hefenan di Kuerponan Polisial ku Ministernan di Hustisia di Aruba, Kòrsou i Sint Maarten

Despues di e Justitieel Vierpartijen Overleg (JVO) na Aruba e Kolegio di Hefenan di Polis di Aruba, Islanan BES, Kòrsou i Sint Maarten a reuní ku Minister di Hustisia di Aruba, sr. Tjon, Minister di Hustisia di Kòrsou, sr. Hato i Minister di Hustisia di Sint Maarten sra. Richardson. E reunion ku e ministernan a tuma lugá despues di un reunion di e Kolegio di Hefenan di Kuerponan Polisial huntu ku tim di maneho di Kuerpo Polisial di Sürnam.

E reunion aki tabata e promé okashon kaminda e Kolegio di Hefenan di Kuerponan Polisial a reuní ku tur e Ministernan di Hustisia di e islanan Hulandes Karibense. E Ministernan a duna di konosé ku nan no ta na altura di tur e proyektonan i esfuersonan ku e Kolegio ta hasiendo. Esaki ta sumo importansia pa e ministernan pa asina nan por sostené e hefenan di kuerpo polisial i yuda nan kaminda esaki ta nesesario.

Ministernan a haña un splikashon amplio di e orígen di e Kolegio i nan añanan kolaborando ku otro di forma estrecho. E hefenan di kuerpo a partisipá ku nan ta kolaborá tambe ku kuerponan polisial di Hulanda i Ministerio di Hustisia i Seguridat. Mas aleu e hefenan di kuerpo a duna splikashon detayá di kon nan ta kombatí kriminalidat, agènda stratégiko, plan di maneho i otro temanan di prioridat pa 2023. Ministernan a suprayá e nesesidat pa ta enbolbí den e aspekto finansiero di e Kolegio pa por tin un mihó bista kon por aloká fondo pa asesorá e kuerponan den kombatimentu di krímen.

E reunion a kana den un esfero ameno i a konkluí ku e palabrashon konkreto ku e hefenan di kuerpo polisial lo keda suministrá informashon periodikamente na e ministernan tokante progreso di e proyektonan andando.