Parlamentario Seferina ta felisitá Minister Sithree van Heydoorn pa atenshon ku e ta duna na Deporte

Ku hopi alegria Miembro di Parlamento pa frakshon di MFK, David Seferina a tuma nota kon Minister di Enseñansa, Siensia, Kultura i Deporte sr. Sithree van Heydoorn ta duna atenshon na Deporte.

 

Parlamentario pa frakshon di MFK a tuma nota ku despues ku 6 selekshon, di diferente liga a titulá kampion den area di Latino Amérika na aña 2022. Minister van Heydoorn a otorgá no mas ku 180 Leptop na e miembronan di e selekshonnan, poniendo aksento ku edukashon tambe ta importante.

 

Meskos Minister van Heydoorn ta trahando riba diferente proyekto pa pone lus i tambe yerba artifisial na diferente kancha deportivo. E Minister enkargá ku Deporte a bin ta bisti deporte di luho dor di regalá no mas ku 35 ekipo di liga pariba, tur dirigente di liga pariba, umpire i skorernan di Little League mas ku 1000 unifòrm i tambe IPAD. Ku e meta pa e IPAD wòrdu usa pa skor wega i tambe generá data di e hungadónan.

 

Por mira klaramente ku minister Sithree van Heydoorn ta kumpliendo ku akuerdo di gobernashon i tambe demostrá ku realmente su kurason ta bati pa deporte.

 

Den Parlamento e Minister por konta ku e sosten di frakshon di MFK.

 

David Seferina

Miembro di Parlamento

Pa Frakshon di MFK

 

 

Kòrsou, 27 di febrüari 2023