MINISTER COOPER TA REUNÍ KU DOS EHEKUTIVO DI CAP

Willemstad – Riba djamars 7 di febrüari, Minister Charles Cooper a reuní ku dos ehekutivo di Curaçao Airport Partners (CAP), esta sr. Fabio Russo Corea ku ta Presidente di e Hunta di Supervishon di CAP, i sr. Jonny Andersen ku ta CEO pa CAP. Meta di e reunion tabata pa Minister Cooper haña un splikashon di e kambionan ku nan ta deseá di trese den e infrastruktura pa loke ta nos aeropuerto.

Entre otro nan lo ta deseá pa laga traha dos hangar nobo pa avionetanan privá por bai aden. Ademas, ta deseá pa hasi trabounan di demolishon di e edifisio konosí komo ‘white elephant’. Tin plan tambe pa laga traha un kaminda públiko, ku ta bai konektá riba Rooseveltweg, pa bai direktamente na e aeropuerto.

Nan a mustra e fasilidatnan nobo ku tin den e Jet Center, ku tin tambe dos sala di VIP nobo, inkluso servisio VIP pa risibí i hiba pasaheronan.

Tur esakinan den kuadro pa yuda buta Kòrsou su aeropuerto mas riba mapa internashonal.