Minister Dangui Oduber MINISTER DANGUI ODUBER A PRESENTA “THE GOODWILL AMBASSADOR” NA FAMIANAN THOMAN Y SCHLAGETER

ORANJESTAD ― Dialuna anochi Minister di Turismo y Salud Publico sr. Dangui Oduber tabata na Papiamento restaurant. Aki e mandatario tabata tin e placer pa honra dos famia cu ta bishitando Aruba loyalmente cu un reconocimento di embahador di bon buluntad den presencia di nan famia.

E reconocimento aki di “The Goodwill Ambassador” semper ta keda presenta pa e Minister di Turismo como un toke di aprecio pa bishitantenan cu a bishita Aruba pa 40 aña of mas consecutivamente.

E honradonan reconoci como e embahadornan di bon boluntad a bay pa Holly & Demi Thoman y pa Beth & George Schlageter. Ambos famia ta bishitando nos isla consecutivamente pa mas di 45 aña.

E dos famianan aki a conoce otro na momento cu nan mayornan a cumpra timeshare na final di añanan ‘70 na Aruba Beach Club. Nan yuinan tambe ta bin Aruba tur aña hunto cu e nietonan. Tur dos famia tin 4 generacion (bisa-welo, welo, yiu, nieto) di nan famia cu ta bishitando nos isla tur aña. Un bunita amistad familiar cu e dos famianan aki a forma riba nos isla.

E famianan a menciona cu nan ta stima nos isla masha hopi mes, especialmente pa nos solo cu ta briya henter aña, nos playanan blanco, nos gastronomia, e seguridad y nos hendenan caluroso y amabel.

Minister Dangui Oduber tabata encanta pa por a presenta e plakaat aki na famianan Thoman y Schlageter hunto cu algun regaldo den presencia di demas famia pa yama nan danki pa a scohe Aruba como nan destinacion faborito y nan cas lew foi cas pa mas di 4 decada.