Enkuentro Ora di Pregunta!
E prome “Vragenuur” no a tuma lugá: Minister di GMN no a presentá!
Djaweps, 23 di mart 2023, Parlamento a konvoká e promé “Vragenuur” (Ora di pregunta), kual ta un instrumento nobo ku parlamentarionan tin pa por hasi preguntanan na ministernan riba temanan aktual i urgente.
Den e kaso aki sra. Ana Maria Pauletta a hasi petishon pa un Vragenuur riba e tópiko: Restrukturashon sektor di kuido di salú mental. Pa kontestá e preguntanan a pidi presensia di Minister di Salubridat Públiko, Medio Ambiente i Naturalesa den sala di Parlamento.
E enkuentro públiko aki, kual mester a kuminsá 9or, tabata konta ku interes di vários miembro di Parlamento, ku tabata presente den e sala di reunion. Despues di spera algu mas ku mei ora Presidente di Parlamento a konstatá ku e minister lo no presentá. E minister a duna di konosé ku tabatin un mal entendimentu interno i ku e ta dispuesto pa bin kontestá e preguntanan riba un otro yamada.
Presidente di Parlamento a informá e miembronan presente i a stipulá pa e preguntanan riba e tópiko menshoná keda tratá den e siguiente Vragenuur ku lo ta 6 di aprel próksimo.