Minister di Asuntunan General enkargá ku kordinashon di trabounan di sektor di Agrikultura, Medio Ambiente i Naturalesa GMN señor Gilmar Pisas ta risibí informahon di kolaboradornan di su sektor

Willemstad – Manera ya ta konosi, siman pasá Minister di Asuntunan General enkargá ku kordinashon di trabounan di sektor di Agrikultura, Medio Ambiente i Naturalesa GMN señor Gilmar Pisas a tene un reunion informativo ku representantenan di e sektor. Durante e reunion aki a hasi diferente palabrashon i unu di nan tabata ku e siman aki mester a presentá informashon adishonal tokante diferente tópiko i raportahenan na Minister Pisas.

Un di e tópikonan importante tabata e parti di inspekshon i kontròl pa kombatí dumpmentu di shushi ilegal. Ainda tin sitionan kaminda kontra pago ta dump shushi ilegal kual mester keda atendé ku man duru. Minister Pisas a keda informá tambe por ehèmpel tokante e plannan ta drecha playanan i damnan pero tambe un plan duradero pa atendé ku Sargassum ku tur aña ta afektá parti di nos kosta. Tur e tópikonan aki, pero tambe e aspekto di kompanianan ku ta okashoná molèster pa habitantenan ta tòpikonan ku Minister Pisas lo duna mas atenshon e periodo ku ta bini.