VIDEO ULTIMO ORA : DETENSHON MIEMBRO DI NLS NA REPÚBLICA DOMINICANA RELASHONÁ KU INVESTIGASHON THEMIS

 

 

DETENSHON NA REPÚBLICA DOMINICANA RELASHONÁ KU INVESTIGASHON THEMIS

Djabièrnè 14 di aprel 2023, e sospechoso di inisial U.L.W. a keda detené na República Dominicana.
Ministerio Públiko di Kòrsou a hasi un petishon di ekstradishon di U.L.W. na outoridatnan di República Dominicana den kuadro di e investigashon di gran eskala yamá Themis. Investigashon Themis bou di direkshon di Ministerio Públiko Kòrsou i Ministerio Públiko St. Maarten, ta wòrdu ehekutá dor di un tim di reshèrshi konhunto ku ta konsistí di miembro di RST i di miembro di kuerponan polisial di Kòrsou, St. Maarten i Aruba.
Ta sospechá U.L.W. di entre otro partisipashon na e organisashon yamá No Limit Soldier (NLS). Esaki ta un kolaborashon kriminal ku ta responsabel pa diferente likidashon i asesinato ku a ser kometé den Reino Hulandes i tambe na otro paisnan. Tambe ta sospechá e organisashon di tin hopi tempu kaba involukrá den trafikashon internashonal di droga.
Un parti di e investigashon Themis ya a keda presentá dilanti hues den Korte di Promé Instansia na Kòrsou i entretantu kuater sospechoso a keda kondená. Dos di e sospechosonan a bai den apelashon. Luna pasá a sigui ku tratamentu di Themis den korte di apelashon na Kòrsou. Na e momentu aki tin kuater sospechoso ku ta wòrdu persiguí den Korte di Promé Instansia. Mientrastantu den kuadro di ekstradishon, a ekstraditá e sospechoso C.S.H. ku tabata dos aña será na Reino Uni.