AKUERDO ENTRE KONSULADO MERIKANO I MINISTERIO DI ESKD I SSC

Sentro di Informashon Edukashonal (USA-Education Center) spesialmente pa guia i duna informashon na studiantenan di USA.

WILLEMSTAD – Ministerio di Enseñansa, Siensia, Kultura i Deporte (ESKD) den representashon di Gobièrnu di Kòrsou den estrecho koperashon ku Stichting Studie Financiering Curaçao (SSC) ta firma akuerdo (MoU) ku e departamentu di Asuntunan Públiko di Konsulado Merikano (Public Affairs Section of the US Consulate General Curaçao-PAS). Ku e akuerdo aki ta bai establesé un sentro edukashonal di konseho di Estados Unidos den SSC ku ta bai brinda servisio na nos studiantenan. E sentro ta bai tin konekshon ku mas ku 430 sentro i institutonan internashonal akreditá den mas ku 175 pais kaminda tin institutonan merikano.

Ministerio di ESKD ta duna sostén na e sentro aki i alabes nan ta traha huntu ku e Konsulado Merikano. Meta di e MoU ta pa pone e término di e areglo pa Ministerio di ESKD pa fasilitá estudio na Estados Unidos i e akuerdo tin un durashon di 1 aña. Den esaki tin vários ophetivo ku mester kumpli kuné. Un di nan ta pa duna informashon i servisio na tur nos studiantenan ku ke bai studia òf ku ta studia na Estados Unidos. Ta bon pa menshoná ku e servisio aki ta grátis di forma personal òf di forma virtual. Ta bai guia i duna konseho na e studiantenan pa ku e preparashon di nan dokumentonan ku ta nesesario pa bai studia na Estados Unidos. E sentro di servisio mester ta aksesibel por lo ménos 30 ora pa siman i ta bai keda unbiká den e fasilidat di SSC.

Minister di ESKD sr. Sithree van Heydoorn ta sumamente satisfecho ku e akuerdo aki komo ku huntu nos ta sigui krea lasonan di koperashon pa nos hóbennan ku ta bai studia na Estados Unidos.
—
Sr. Sithree van Heydoorn
Minister di Enseñansa, Siensia, Kultura i Deporte

** riba e portrètnan athunto por tuma di e momento ku a firma e akuerdo entre sr. S.Justiana den representashon di SSC i sra. M. Bond Konsul General di Estados Unidas den presensia di Minister sr. S. Van Heydoorn, Minister sra. R. Larmonie-Cecilia, Minister O. Martina i Minister S. Hato