MANEHO NOBO PA BIAHA KU MENOR DI EDAT

Pa por protehá menornan di edat mas mihó, ministerio di hustisia ta introdusí un maneho nobo pa por biaha ku menornan di edat. Pa por fasilitá e proseso na Imigrashon i pa evitá ku un mayor ta bandoná Kòrsou sin e outorisashon nesesario di e otro mayor, ta introdusí un formulario di outorisashon, ku por download for di website di gobiernu di Kòrsou.

Mayornan (òf esnan responsabel pa e menor di edat) mester yena esaki pa e menor di edat por biaha su so, ku un mayor so òf ku otro persona ku no ta su representante legal. Entrante promé (1) di yüli, tur menor di edat ku no ta biaha ku su representante(nan) legal, mester demostrá ku e tin outorisashon di su representante(nan) legal, dor di mustra e formulario firmá dor di esnan outorisá. Huntu ku e formulario, tin ku demostrá naturalmente ken ta e persona(nan) ku outoridat riba e yu ku a firma e formulario di outorisashon.

Ken ta outorisá, mester sali den e dokumento di Korte di Hustisia (uittreksel di Gezagregister) i/uittrekselnan (Akta di nasementu of ‘Lange uittreksel’) di Kranshi. Minister di Hustisia, sr. Shalten Hato, ta duna hopi balor na e proseso di kòntròl na Imigrashon pa garantisá ku tur kos ta bai sin problema. P’esei ta pone un periodo di grasia tambe pa e periodo entre 1 di yüli te ku 1 di ougùstùs 2023, pa hende ku ta biaha ku nan yu i no ta na altura di e maneho nobo ainda. Durante di e periodo aki, lo komuniká i informá tokante e maneho nobo i e kambionan.

E formularionan pa yena tin den diferente idioma via di e lenk.