HONOR NA BALUARTE ELIS JULIANA

Desvelo di mosaika na honor di Elis Julaina

WILLEMSTAD – Dia 23 yüni último a hasi 10 aña ku nos baluarte Elis Juliana a fayesé. Fundashon Nieuw Nederland pa medio di sr. Rensley Victoria i sr. Lionel Janga huntu ku Avila Beach Hotel den presensia di Minister di Ensenansa, Siensia, Kultura i Deporte sr. Sithree van Heydoorn a hasi desvelo di un mosiako na e un pilar na entrada prinsipal di Avila Beach Hotel.  E mosaiko a keda desvelá konmemorando ku elogio, honor i gran apresio na su ilustre baluarte dòkter Elis Juliana.

E desvelo a tuma lugá den presensia di yu muhé di sra. Mayra Juliana, sra. Myrtha Leetz-Cijntje, sra. Maria Liberia, sra. Marusca Manuel i vários habitante mas di e bario di Nieuw Nederland. Avila Beach Hotel a partisipá ku nan lo sigui traha huntu ku e Fundashon i laga pone mas mosiako na honor di nos baluartenan na tur e pilar nan di Hotel speshalmente pa e motibu ku otro aña nan ta selebrá nan 75  aniverario.

Minister Di ESKD sr. Sithree van Heydoorn ta sumamente kontentu ku e insisiativa partikular di suidadanonan ku ta traha huntu organisashonnan turísiko i ku ta duna balor na nos herensia kultura.

—

KOMUNIKASHON

Biografia kòrtiko di sr. Elis Juliana:

Sr. Elis Juliana a nase di 8 ougùstùs 1927 den e bario di Nieuw Nederland. Ela bai skol tékniko i bira bankwerker. Di 1946 pa 1947 e a sirbi den servisio militar i profeshonalisá bira bankwerker fini. Ela traha tambe komo wardadó di presu i na 1959 e a traha na Bureau Justitiële Zorg ku a bira Bureau Cultuur en Opvoeding. Ela traha aki den e área di kultura i arkeologia.

Tambe sr. Juliana a studia etnografia pa asina por konosé diferente dialekto di Pueblo di Kòrsou. Su interѐs pa instrumento musikal i artefaktonan di Kòrsou a hib’é pa lanta e Fundashon ZIKINZA kaminda tur e artefaktonan a keda registrá. E kolekshon ta wardá na Archivo Nashonal Kòrsou. Sr. Julianan a skibi i hasi arte visual tambe. Un di su poesianan mashá famá ta; ‘Hé Patu’’. Tambe e a trese e forma Hapones di skibi poesia ku yama Haiku serka nos. Riba 18 yüni 2013, e la haña e título di dòktor honoris causa pa su trabounan ku hasí pa komunidat di Kòrsou. Sinku dia despues, esta riba 23 yëni 2013, ela fayesé na e bunita edat di 85 aña.

Algun Haiku di Elis Juliana

• Para den kouchi ta fluit pa laga parse ku e ta felis.
• Bichi ta siefu ma e sa unda koba pa saka probecho.
• Bida di hende ta manera piñata, yen di sorpresa.
• Kon ku mi pinta mi kara na payaso: Wowo ta reda!
• Vruminga loko no tin tempu pa pika… muchu okupá.