E VISION PA TRANSFORMA E REFINERIA DEN UN REFINERIA DI HYDROGENO PRONTO TA BIRA REALIDAD
Minister Glenbert Croes:
E negociacionnan entre companianan di Gobierno y Acciona Energia ta yegando su final
E VISION PA TRANSFORMA E REFINERIA DEN UN REFINERIA DI HYDROGENO PRONTO TA BIRA REALIDAD
ORANJESTAD – Minister di Energia Glenbert Croes ta informa comunidad di Aruba cu e negociacionnan entre e grupo di companianan di Gobierno cu ta Utilities, Web, Elmar, y RDA cu Acciona Energia ta yegando su final, pa asina por cuminsa transforma e zona di refineria den e “Valle de Hydrogeno” – Hydrogen Valley.
Minister Croes a indica cu Gobierno tabata tin un reunion virtual cu Acciona Energia y tur participantenan di Aruba y di Spaña, cu ta parti di e negociacionnan, y ta confirma cu e vision pa Aruba tin su refineria di hydrogeno, pronto ta bira realidad. Aruba lo conoce un proyecto di un zona di refineria di hydrogeno, cu lo trece beneficionan economico y financiero grandi pa e pais. Tambe, e proyecto aki lo tin su efectonan positivo riba e mercado laboral, mirando cu e lo crea cupo di empleo pa e comunidad.
Pa e mandatario, e realisacion di e proyecto aki ta un satisfaccion hopi grandi, mirando tur e beneficionan cu e proyecto aki lo trece pa pais Aruba. E companianan estatal, manera RDA, FMSA, Web, Elmar y Utilities, tur lo beneficia di e proceso aki creando asina un futuro briyante pa nos pais y e futuro generacionnan.
“Cu hopi entusiasmo mi kier comparti e bon noticia cu henter e comunidad di Aruba, cu pronto lo pone e prome piedra pa cu construccion di e proyecto aki.
Cu e proyecto aki, Gobierno lo laga atras un fundeshi di un vision energetico cu mundo lo papia di dje. Aruba lo tin e prome “Valle de Hydrogeno” den e region Caribense, cu ta alcansabel, realisabel, y economicamente factibel pa e economia local y pa exportacion” Minister Croes a expresa.
