KONTENTU ta lansa programa inovativo pa studiantenan atleta lokal

KONTENTU ta lansa programa inovativo pa studiantenan atleta lokal

 

Willemstad- Ayera durante oranan di atardi KONTENTU Begeleiding huntu ku Ministerio di Enseñansa, Siensia, Kultura i Deporte, a lansa un proyekto piloto nobo spesialmente pa studiantenan ku ta práktika futbòl i beisbòl na nivel haltu. E programa ta diseñá pa sostené i mehorá e karera akadémiko di studiantenan atleta mientras nan ta sobresalí den nan deporte.

 

Mester rekonosé ku studiantenan atleta tin un trayektorio úniko ku nan mester pasa aden durante nan hubentut. Banda di e echo ku nan tin un skedjùl drùk di treinen intensivo, nan mester balansá tambe nan karera akadémiko ku tambe ta eksigí hopi tempu i atenshon. Ademas durante e periodo aki varios hóben ta pasando den pubertat, kaminda nan mester siña dil ku diferente emoshon nobo tambe.

 

Pa e motibu aki KONTENTU Begeleiding, huntu ku Ministerio di Enseñansa, Siensia, Kultura i Deporte a lansa un proyekto ku e meta pa yuda sostené studiantenan atleta durante e periodo aki di nan bida. Dor di ofresé ‘huiswerkbegeleiding’ i kursonan di komunikashon e studiantenan atleta por saka nan máksimo potensial tantu riba tereno deportivo, komo akadémiko ku e proyekto aki.

 

E proyekto piloto yamá ‘studiantenan atleta’ lo ranka sali awe djaluna 14 di ougùsùs 2023.

Pa e proyekto piloto aki 20 studiante, ku awor lo kuminsá ku skol avansá a keda selektá. Huntu ku federashon di futbòl lokal, FFK, i tambe Curaçao Little League, 10 studiante di kada deporte, ku ta den selekshon i ta bayendo skol avansá a keda selektá.

 

KONTENTU Begeleiding su meta ta pa den futuro, meskos ku na paisnan grandi, tur studiante ku ta práktika deporte na nivel haltu, por risibí e sosten akadémiko nesesario pa asina prevení ku nan ta kai atras ku nan trabounan di skol dor di deporte.

 

Durante e seremonia ofisial ku a tuma lugá ayera, Minister di Enseñansa, Siensia, Kultura i Deporte, Sithree van Heydoorn, a duna di konosé ku ta sumamente importante pa kombina enseñansa i deporte paso na final di dia deporte ta keda un riesgo. Pues mester buska un balansa entre deporte i enseñansa pa garantisá un futuro briante.

 

Ademas, segun Chelsea Losiabaar di KONTENTU Begeleiding, e meta no ta ku lo kita e atenshon di for di deporte. Al kontrario e énfasis ta riba e kombinashon di deporte i edukashon. Si por yuda kada studiante atleta hasi esaki korektamente, por yuda garantisá un futuro briante mirando ku ta desaroyá e hóben mental i físiko.