KOMUNIKADO DI PRENSA 386/2023.
16 ougùstùs 2023.

Detenshon pa intento di asesinato.

Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Djárason 16 di ougùstùs 2023 alrededor di 17.06’or, Sentral di Polis a hanja informashon di
un kaso di hinkamentu den Havenstraat. Mesora a dirigí un unidat polisial na e sitio.
Na yegada di e unidat polisial, a bin topa ku un dama ku tabata sangrando bastante na su
brasa, barika i lomba.
For di investigashon a sali na kla ku e dama su ex pareha mester a hinka e dama tres bes ku
kuchú pa despues e bandoná e sitio. Personal di ambulans a wòrdu dirigí pa e sitio ya komo
ku e víktima su situashon tabata bastante krítiko. Despues di a stabilisá e víktima a
transporté pa sala di emergensia di C.M.C., pa risibí tratamentu médiko mas avansá.
Mesora Unidat di Rio Canario a wòrdu dirigí na adres di e sospechoso. Ora e unidat di Rio
Canario tabata bai e adres di e sospechoso a señalá e hòmber sospechoso den un vehíkulo i
a start un persekushon i a logra para e vehíkulo . Na e momento ey e sospechoso a kwe un
kuchú i a korta su pòlsnan. Polis na e sitio a dune asistensia wardando jegada di ambulans.
Ambulans a yega na e sitio pa duna asistensia i pa despues transporta e sospechoso pa sala
di emegensia di C.M.C., pa risibí tratamentu médiko mas avansá.
Alrededor di 20.40’or detenshon di e hòmber sospechoso L.J. di 42 aña di edat nase na
Kòrsou, a tuma luga na Poli di C.M.C.
A presentá e sospechoso dilanti di un fiskal ouksiliar ku a ordená su enkarselamentu
pendiente di mas investigashon.