Seshon di informashon di Ministerio di Finansa ku stakeholdernan di sektor di wega online

Djamars 15 di ougùstùs, a tuma lugá un seshon informativo den kua Ministerio di Finansa a informá un kantidat di stakeholder den e sektor di wega online tokante e último desaroyonan den e reformashon di e sektor. Meta di e enkuentro tabata pa informá e sektor di e intenshon pa emití lisensianan nobo basá riba e regulashon nashonal di wega di azar di eksterior (LBH) entrante 1 di sèptèmber 2023, i tambe informá tokante e konferensia i expo ku lo tuma lugá na Kòrsou na sèptèmber 2023.

For di 1 di sèptèmber 2023, Gaming Control Board lo habri un portal di aplikashon i registrashon. Via e portal di aplikashon, operadornan por apliká pa un pèrmit basá riba e LBH. Operadornan ku ta ofresé wega online bou di un pèrmit eksistente i ku tin intenshon di apliká pa un pèrmit di wega di azar riba distansia bou di e lei aktual òf otro lei den futuro por registrá nan mes via e portal di registrashon. E último aki a wòrdu introdusí pa asina gobièrnu por haña un bista di e kantidat di operadornan ku ta operá for di Kòrsou i ku posiblemente lo apliká pa un pèrmit di wega online na Kòrsou.

E otorgamentu di pèrmit i e supervishon di e sektor di wega online lo tuma lugá den bista di e kontenido, base i ophetivo di e LBH, ku ta enserá protekshon di hungadónan, prevenshon di adikshon na wega di plaka i prevenshon di aktividatnan kriminal manera froude i labamentu di plaka.

Solamente partidonan ku ta ofresé wega online i den e kuadro di esaki ta enkargá ku registrashon i verifikashon di hungadónan, ehekushon di transakshonnan finansiero i maneho di plaka di hungadónan por ta eligibel pa un pèrmit basá riba e LBH. Ademas, e petishonario mester ta un persona hurídiko ku a keda establesé bou di lei di Kòrsou i ku tin su sede legal na Kòrsou.

GCB por retirá e pèrmit pa ofresé wega di azar online, entre otro, si e doño di e pèrmit ta violá algun di e reglanan di LBH òf e reglanan di pèrmit, òf si GCB ta sospechá òf tin motibu(nan) serio pa sospechá ku e doño di e pèrmit òf un persona klave den e organisashon di e doño di e pèrmit ta sospechoso di un violashon di e Kódigo Penal.

Durante e seshon di informashon a enfatisá ku e desaroyonan entrante 1 di sèptèmber benidero no ta enserá en prinsipio niun kambio den e leinan eksistente ni den e pèrmitnan pa e outoridatnan aktual di pèrmit. Ministerio di Finansa i Gaming Control Board lo no prohibí aktividatnan ku ta kanando di e doñonan di pèrmit aktual, pero lo habri e posibilidat pa operadornan haña un pèrmit direktamente bou di LBH. E derecho di pèrmit ta ser sperá di baha na NAf. 8,000 pa luna, loke tambe ta konta pa e doñonan di pèrmit aktual. Esaki ta e promé paso den e transishon pa un industria di wega reformá na Kòrsou, antisipando riba e Lei di Weganan di Azar (LOK) ku lo drenta na vigor.

Durante di e enkuentro, e sektor a haña informashon tambe di e evento “Minister of Finance in collaboration with SiGMA”, ku lo tuma lugá di 25 pa 27 di sèptèmber di e aña aki. SiGMA ta un organisadó di evento mundialmente renombrá ku eventonan den Europa, Asia, Afrika i Latinoamérika. E evento “Minister of Finance in collaboration with SiGMA” ta nan promé evento den region di Caribe. Ta un orguyo grandi pa Ministerio di Finansa traha huntu ku un organisashon asina prestigioso pa organisá e evento aki.

E evento lo ta un enkuentro di empresanan internashonal i lokal i lo trese banda di oportunidatnan di interkambio di konosementu riba tópikonan relevante, manera leinan i negoshi na Kòrsou, tambe oportunidatnan balioso di netwerk. E evento lo ofresé un plataforma pa empresanan lokal presentá nan ekspertisio i servisionan. E leinan nobo ta habri hopi posibilidatnan ku no tabata eksistí promé. Servisionan di trust, funshonnan klave, un ola di empresanan ku ta ubiká nan mes na e isla, perspektiva di trabou i hopi mas. Kòrsou ta den komienso di un fase yen di perspektiva nobo i eksitoso. E evento aki lo ofresé e promé oportunidat pa hopi habitante lokal i pa profeshonalnan partisipá den e industria mundial di wega online ku ta wòrdu kalkulá ku lo generá 128 miar dòler e aña aki.

Pa apertura di e evento, World Poker Tour lo organisá un ‘Curaçao Invitational Poker Tournament’ riba djaluna 25 di sèptèmber. E torneo ta trese mas ku 100 hungadó huntu, inkluyendo hungadónan invitá, hungadónan kualifiká for di torneonan satelital online i hungadónan kualifiká for di e sala di poker propio di Kòrsou.

Na e “mesa prinsipal” lo tin hungadónan di poker profeshonal i selebridatnan ku lo partisipá den e torneo, ku lo ser grabá i transmití rònt mundu. Ademas, e torneo aki ta duna e komunidat lokal e oportunidat pa partisipá i eksperensiá e eksitashon personalmente.

E torneo di World Poker Tour ta ser organisá ku sosten i kolaborashon di e Curaçao Tourist Board.