AQUALECTRA TA LANSA KAMPAÑA PA PROMOVÉ UZO KONSIENTE DI AWA I KORIENTE
Teniendo kuenta ku kambio mundial di medio ambiente i skarsedat di rekursonan:
AQUALECTRA TA LANSA KAMPAÑA PA PROMOVÉ UZO KONSIENTE DI AWA I KORIENTE
Willemstad – Djaluna 21 di ougùstùs- Aqualectra a lansa un kampaña edukativo pa promové uzo konsiente di awa i koriente. E kampaña tin primeramente e meta pa konsientisá i edifiká un i tur tokante e posibilidatnan práktiko ku tin, tantu na kas i trabou, ku por yuda redusí gastunan haltu di awa i koriente fin di luna. Si konhuntamente nos uni forsa pa redusí uzo di awa i koriente, nos ta kontribuí tambe komo pais na e esfuerso mayó i mundial pa redusí kambionan drástiko di nos medio ambiente. Dor di kambia mal kustumbernan manera laga kranchi habrí òf lus, èrko i otro aparatonan sendé pòrnada, kada siudadano por disfrutá di e benefisio finansiero fin di luna. Alabes, nos ta kontribuí konhuntamente na e kousa mas grandi di redusí kambionan drástiko na nos medio ambiente i konservá rekursonan ku aktualmente ta skars mundialmente.
Awa i koriente ta nesesidat básiko humano. No opstante di esaki, Aqualectra kier yuda konsientisá komunidat di posibel esfuersonan ku por kontribuí na redukshon di e resibu di fin di luna si ta hasi uso mas konsiente di awa i koriente. Komo pais nos por ta orguyoso ku mas o ménos 30% di koriente lokal ta keda produsí komo energia renobabel uzando bientu i solo. Ounke ku Aqualectra tin plannan pa oumentá e produkshon di energia renobabel, e realidat aktual ta ku e sobrá 70% di produkshon ta dependé di petroli. Uzo di petroli pa produkshon di awa i koriente ta nifiká dos kos; nos preis di awa i koriente ta kambia regular a base di e preisnan di kombustibel ku ta fluktua na nivel mundial, i tambe kontribushon na e kambio drástiko di medio ambiente ku mundu kompletu ta eksperensiando.
Kambio di nos medio ambiente ta eksigí kambio den e forma ku tur hende ta uza awa i koriente na kas i boka di trabou. Uzo no konsiente di awa i koriente ta nifiká mas gastu, pero tambe e ta impaktá futuro di humanidat riba e mundu aki. Tempu a kambia i ta nesesario pa nos tambe kambia kun’é. Durante di e próksimo lunanan diferente ‘influencers’ lokal lo duna tepnan balioso ku por redundá den sparmentu di awa i koriente. E mensahe klave lo ta ku tin hopi kos ku kada persona por hasi pa baha su gastunan di awa i koriente. Kambio di mal kustumber no ta solamente kumbiní kada persona individual, pero tambe humanidat su futuro por lo general. Aqualectra ke invitá komunidat kompletu pa sosten’é e movementu positivo aki, pa nos mes i pa nos futuro.

