KOMUNIKADO DI PRENSA 400/2023.
26 ougùstùs 2023.

Aksidente di tráfiko ku morto.

Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Djasabra 26 di ougùstùs 2023, alrededor di 02.59’or, Sentral di Polis a risibí informashon ku
un aksidente di tráfiko a kaba di tuma lugá riba Schottegatweg-Oost i ku tin un persona
gravemente heridá.
Mesora Sentral a dirigí unidatnan na e sítio i na nan yegada nan a bin topa un outo di famia
den kua tabatin un shofùr sintá ku ya no tabata duna señal di bida.
For di investigashon preliminar a sali na kla, ku shofùr di e vehíkulo aksidentá tabata kore
riba Schottegatweg-Oost den direkshon di Biesheuvel.
Te ainda pa motibunan deskonosí el a dal ku su outo kontra di e asera mei-mei di kaminda,
seguidamente dal un bòrchi di tráfiko, pèrdè kontròl, pasa over di e parti di kaya destiná pa
tráfiko den direkshon kontrario (direkshon di Zuikertuintje), pa despues bai dal
violentamente kontra di muraya di un negoshi na e banda robes di kaminda.
A konsekuensia di e multiple leshonnan ku e víktima a risibí, el a fayesé na e sítio di e
aksiedente.
Ta trata di e hòmber yamá Germsley Francis Eldrich Garcia nase na Kòrsou dia 30 di aprel
1983.
Investigashon den e kaso aki ta kontinuá.