PRONTO MAS LUS DI KAYA DEN BARIONAN

Willemstad – Minister Charles Cooper a reuní resientemente ku Aqualectra tokante lus di kaya den barionan. Meta di e enkuentro tabata pa yega na palabrashonnan konkreto pa asina sigui iluminá barionan, ku enfoke riba barionan kaminda no tin sufisiente lus di kaya. Lus di kaya ta kontribuí engrande na seguridat di bario den oranan di anochi.

Durante di e reunion a palabrá ku:

• E lusnan di kaya, komo propiedat di gobièrnu, ta pasa pa Aqualectra,
• Aqualectra mes lo por sòru pa por tin sufisiente lus den stòk pa por kuminsá iluminá mas tantu den barionan otro aña,
• VVRP mester traha un planifikashon di kua bario i área lo mester atendé, i esaki den kua sekuensia,
• VVRP mester risibí informashon di Aqualectra tokante kada bario su kantidat di lusnan aktualmente,
• Aqualectra lo traha un konsepto di dokumento di traspaso i un akuerdo di mantenshon pa e lusnan,
• Aqualectra mester kordiná ehekushon di e trabouban di instalashon konformé planifikashon, ora esaki ta aprobá.