MINISTER COOPER TA ATENDÉ MOTORSPORT NA RONDE KLIP

Willemstad – Dia 8 di sèptèmber Minister Charles Cooper tabatin diferente reunión tokante desaroyonan di Motorsport na Ronde Klip. Tur esaki ku e meta pa garantisá un unión i kontinuashon di tur sorto di deporte di Motorsport.

Primeramente, Minister Cooper a sinta na mesa ku e direktiva di Fundashon Autosport Curaçao (FAC) huntu ku e direktiva di 2 diferente grupo di Karting (Curaçao International Karting Foundation i Extreme Sport). E direktiva di e 2 grupo di Karting a informá Minister Cooper di e desaroyonan den e mundu di Karting, i nan palabrashonnan ku e direktiva di FAC pa por yega na un pista di Karting mas pronto posibel riba e tereno na Ronde Klip.

Despues Minister Cooper a reuní ku e direktiva di FAC huntu ku e direktiva di Drag Racing Association Curaçao (DRAC). E direktiva di DRAC a informá Minister Cooper di e reunionnan ku DRAC a sostené ku FAC. DRAC a yega na un proposishon di koperashon ku FAC, i FAC a aseptá esaki. Riba korto plaso e proposishon di koperashon ta konkretisá pa yega na un koperashon duradero.