GRAN APERTURA DI KAMPIONATO FFK PROMÉ DIVISHON 2022-2023!
GRAN APERTURA DI KAMPIONATO FFK PROMÉ DIVISHON 2022-2023!
JONG HOLLAND LO TOPA JONG COLOMBIA DJADUMINGU PROMÉ DI ÒKTOBER, 6’OR DI ATARDI DEN STADION ERGILIO HATO!
Kampionato FFK Promé Divishon su gran apertura lo tuma lugá djadumingu promé di òktober 2023, den Stadion Ergilio Hato pa 6’or di atardi. E dos ekiponan ku lo mira akshon durante e gran apertura di Kampionato FFK Promé Divishon 22-23 ta Jong Holland i Jong Colombia.
Un tabla lo bula den Stadion Ergilio Hato djadumingu ora Jong Holland bin tur ku tin pa defendé su título di kampion miéntras Jong Colombia tambe lo bin pa bai ku e viktoria despues ku kampionato pasá nan a kai chikí durante e final di Promé Divishon!
Kampionato FFK 22-23 lo wòrdu dediká na e siguiente baluartenan; sr. Marcelo Marceli (èks tékniko), sr. Elfried Albertus (èks dirigente i kolaboradó di FFK), sr. Anthony Meulens (èks rèfri), sr. Raymond Lucas (èks hungadó) i sr. Errol ‘Roy’ Virginie (èks hungadó). E pèrsonanan aki ta tin un kontribushon enorme na e desaroyo di e deporte rei, futbòl. P’esei nan a keda homenagiá i FFK a dediká e kampionato di e aña aki na nan.
Entrada pa e Kampionato FFK Promé Divishon ta kosta fl 7.50,- pa adulto miéntras mucha di 6 te ku 12 aña i 60+ ta paga solamente fl. 5,-. Awor tin oportunidat pa bo ‘swipe’ tambe i paga bo karchinan ku lo ta optenibel djadumingu dia di wega for di 5’or di atardi na e lokètnan di Stadion Ergilio Hato.
Promé ku e gran apertura aki tuma lugá lo tin e parti protokolar ku rekonosementu di nos baluartenan di e añan aki i e sake di e promé bala. Sherrel ‘Adjatay’ Denisia tambe lo tei pa deleitá nos ku su piesa di Kantadó Mayó, mirando ku nos ta klousurando siman di kultura i durante ‘half-time’ NGM Brassband lo sòru pa un show tur afó.
Despues di hopi warda, bala lo kuminsá lora! Pueblo di Kòrsou ta keda kordialmente invitá pa bin na bòshi, bin apoyá bo ekipo preferí i disfrutá ku bo famia di e deporte rei, futbòl!
FFK ta wardabo na e gran apertura di Kampionato FFK Promé Divishon 22-23!
29 sèptèmber 2023
