NO WAK DEN SOLO DURANTE EKLIPSE SOLAR PARTIAL

NO WAK DEN SOLO DURANTE EKLIPSE SOLAR PARTIAL

Willemstad –  Djasabra próksimo dia 14 di òktober tin un eklipse solar parsial i Ministerio di Salubridat, Medio Ambiente i Naturalesa ta konsehá i rekomendá tur hende pa nos tur kuida nos bista.

Segun informashonnan di Servisio Meteorológiko e eklipse solar di djasabra awor 14 di òktober lo kuminsá mèrdia 12:47 aki na Kòrsou i lo yega su punto máksimo 14:30’or (mitar di tres). Na e momento ei kasi 61% di solo lo ser kubrí dor di luna. E fenómeno aki lo kaba 16:05’or, esta sinku pasá di kuater di atardi.

Durante di e eklipse parsial ta rekomendabel pa no wak den solo, pasombra esaki por ta dañino pa nos wowonan. Pa protehá bo bista bo mester bisti bril speshal si bo ke wak den solo. E bril mester ta di kategoria kuater (4) òf brilnan adekuá. E bril mester duna sufisiente protekshon pa ku rayonan “infra red” (IR) i ultravioleta (UV) ku ta wòrdu produsí dor di solo.

Den kaso ku bo no tin e bril aki ta konsehabel pa no wak den direkshon di e eklipse parsial aki. Un konseho ta bai na mayornan i tur esnan ku tin un òf mas persona den kuido bou di su responsabilidat, manera nos muchanan i nos hende grandinan pa nan no wak den solo na momentu ku e eklipse solar ta tumando lugá.

Wak den solo por tin konsekuensia ménos agradabel i hasta dañino di forma permanente pa bo bista.

Laga nos tur kuido pa otro.