SÒRU PA BO NEGOSHI TA KUMPLI KU REGLANAN NA TUR MOMENTU
MINISTERIO KONSERNÍ DESAROYO EKONÓMIKO
SÒRU PA BO NEGOSHI TA KUMPLI KU REGLANAN NA TUR MOMENTU
PUBLIKÁ RIBA 16 ÒKTOBER 2023
Inspekshon Ekonómiko ta urgi doñonan di establesimentu:
Willemstad – Manera komunidat di Kòrsou mes por a tuma nota, den e delaster simannan akí departamento di Inspekshon Ekonómiko di Ministerio di Desaroyo Ekonómiko ta teniendo kòntròlnan multidisiplinario huntu ku koleganan di Duana, GMN, BAB, Polis i Brantwer, SVB, SOAW (i Aqualectra) na diferente establesimentunan di Horeca. Den e kòntròlnan akí, departamento di Inspekshon Ekonómiko a enkontrá diferente irregularidat pa loke ta trata kumplimentu ku e kondishonnan stipulá den pèrmit di Horeca manera entre otro orario di sera i habri, indikashon di preis di produkto i tambe kondishonnan mará na salubridat i orden públiko.
Departamento di Inspekshon Ekonómiko ta urgí tur doño di establesimentu di Horeca ku no ta kumpliendo ku nan kondishonnan di pèrmit, pa tuma e pasonan nesesario inmediatamente pa remediá e situashon aki promé ku kòntròl bati na bo porta.
Departamento di Inspekshon Ekonómiko ta hasi un yamada tambe na pueblo di Kòrsou kompletu pa kumpra konsiente i mèldu e instansianan konserni mesora na momentu ku bo tuma nota di kualke irregularidat.
Por mèldu irregularidatnan ekonómiko na number di WhatsApp: +5999 562-1444

