Stabilisá e preis di kasnan di pueblo, dor di eliminá indeksashon

Stabilisá e preis di kasnan di pueblo, dor di eliminá indeksashon

 

Frakshon di PAR a entregá e proyekto di lei, pa eliminá e indeksashon riba kasnan di pueblo. Ku e kambio di lei aki, frakshon di PAR ta garantisá ku kua sea e desishon di Gobièrnu ku e kasnan di pueblo, nan lo NO sigui subi di preis. Paso e intenshon ta pa e abitantenan por kumpra nan kas konforme lei.

 

Na aña 1989 gobièrnu a introdusí un indeksashon anual riba e kasnan di pueblo, pero awor despues di mas ku 34 aña ta konstatá ku e indeksashon a subi e preisnan di e kasnan di un forma konsiderabel. Ora ku e intenshon inisial tabata benta, mas lihé posibel di tur e kasnan.

 

Sr. Cooper  a indiká di ta trahando riba un proposishon pa benta di e kasnan i tambe subi e montante di rekorte. E kambio di lei di frakshon di PAR ta sirbi komo base di e kambionan aki. Kualke desishon ku Gobièrnu tuma, e lei lo ta pèrkurá ku di awor aki, pa dilanti e kasnan lo no bira mas karu.

 

Komo frakshon den Parlamento, e 4 parlamentario di PAR ta di opinion ku mester yega na un solushon duradero pa ku benta di e kasnan i kumpli asina aki ku e espíritu di e lei di aña 1962. Esta yuda un grupo di siudadano bira doño di nan propio kas.

 

Awor e lei, lo kana su kamindanan respektivo, kuminsando ku Kolegio di Konseho ( RvA) pa e konsehonan nan nesesario. Frakshon di PAR ta spera ku esaki lo keda atendé ku e urgensia nesesario, tambe mirando ku ta un kambio relativamente fásil.

 

Frakshon di PAR ta spera ku pa komienso di aña 2024 por aprobá e kambio den lei aki den parlamento di Kòrsou. Naturalmente frakshon di PAR ta konta ku e sosten di tur otro miembro di Parlamento.

 

Ana Maria Pauletta