NOS TA TOPA NA BETH DJASABRA AWOR!
MINISTERIO KONSERNÍ DESAROYO EKONÓMIKO
NOS TA TOPA NA BETH DJASABRA AWOR!
PUBLIKÁ RIBA 29 NOVÈMBER 2023
Willemstad- Despues di algun aña, Minister Cijntje, MEO i Fundashon Marshe ta bèk ku e Marshe Sosial Ekonómiko – BETH e luna akí. E edishon akí di Marshe BETH un biaha mas ta keda organisá den un esfera festivo i navideño riba Brionplein i lo tuma lugá djasabra awor, 2 di desèmber for di 10’or di mainta te ku 10’or di anochi. MEO i Fundashon Marshe a risibí mas ku 90 inskripshon di empresarionan mikro i chikí ku lo tei presente pa ofresé nan produkto i servisionan durante henter e dia i tambe lo tin presentashon di diferente grupo musikal i animashon di DJ. Pueblo di Kòrsou kompletu ta keda invitá pa pasa, disfrutá i sostené kada empresario presente durante e edishon akí di Marshe BETH.
BETH ta para pa produktonan Barata, desaroyo Ekonómiko, desaroyo Turístiko i Habri kuponan di trabou. Durante aña 2017, BETH a keda organisá mensualmente ku gran éksito riba e promé djasabra di kada luna. E meta prinsipal ku kual MEO ta organisá e marshe akí ta pa nos hendenan bende òf eksponé nan produktonan lokal i di e manera aki aportá ku den futuro nan lo por habri nan propio empresa, trese mas bida den nos sentro di siudat i ta e deseo pa ku tempu e marshe bira un atrakshon turístiko.
Durante e Marshe BETH djasabra awor ta bai tin entre otro presentation di Zwarte Pretu, GRIK, Grupo di Tambú Brasa Brasa, Rhydd’m Band, Aguinaldo Dushi Ambiente, Dolce Band, One Flavaz i hopi mas.
Bin pasa un dia ku henter famia riba Brionplein djasabra awor, 2 di desèmber i duna un man na desaroyo di nos ekonomia.
