Minister Maduro a reuni cu e ekipo di Departamento di Finansa cu ta dedica pa logra stabilidad financiero pa Aruba
Minister Maduro a reuni cu e ekipo di Departamento di Finansa cu ta dedica pa logra stabilidad financiero pa Aruba
Na forma regular Minister Maduro di Finansa ta reuni cu e departamentonan cu ta resorta bou Ministerio di Finansa y Cultura. Asina siman pasa e mandatario a reuni cu Departamento di Finansa pa asina por repasa e trabounan cu ta sigui den aña 2024 pa por trece stabilidad financiero pa Aruba.
E ultimo añanan Minister Maduro a traha hopi di cerca cu e ekipo di Departamento di Finansa pa asina por logra surpasa e reto financiero cu e pandemia a hinca nos Pais aden. Banda di esaki e ekipo aki tin algun logronan importante cu ta keda registra den historia di Aruba. Por ehempel, den corto tempo nos a logra pa por bay di presupuestonan cu deficit grandi pa presupuestonan cu un surplus mas grandi cu 1% di nos GDP. Importante tambe ta e hecho cu e ekipo aki a logra entrega ya pa dos aña tras di otro, presupuesto na ora y realistico cu ta cumpli cu normanan financiero acorda. E trabou den ekipo a logra pa brinda mas transparencia financiero den raportahenan financiero existente y nobo cu ta wordo publica na un manera regular. E esfuerso grandi di e ekipo di Departamento di Finansa a yuda tambe pa nos Pais por a recobra e credibilidad financiero cu ta duna inversionista e confiansa den Aruba.
Minister Maduro ta enfatisa, cu ainda tin mas trabou pa wordo haci pa Aruba por ta stabil financieramente. E mandatario ta splica cu, entre otro, ta trahando awo pa fortifica e columna financiero pa por sigura cifranan confiabel y procedura eficiente. Ta trahando riba e reto pa baha y haci e debe di Pais Aruba pagabel den e tempo nos dilanti. Ta haci tur esfuerso pa mantene y hisa e credibilidad financiero di Aruba cerca companianan di rating, ya cu esaki ta un prioridad pa nos Pais. Tambe ta keda den contacto continuo cu IMF, WorldBank y CARTAC pa e asistencia tecnico necesario pa capacita nos expertonan y hiba acabo cambionan cu ta fortifica Aruba su economia y finansa. Por ultimo e mandatario ta enfatisa cu lo dedica na presenta Aruba su forza di resiliencia na inversionistnan local y internacional riba e mercado internacional di capital.
“Ta trabounan grandi cu lo exigi hopi di e personal di Departamento di Finansa, pero nos tin pleno confiansa cu e trabou den ekipo lo sigui brinda su fruto y lo yuda pa logra e stabilidad financiero cu tur hende ta desea pa Aruba,” Minister Maduro a expresa.
