GRUPO DI STUDIANTE DI COLEGIO EPI A ENTREVISTA VARIOS MINISTER DEN CUADRO DI E VAK BURGERSCHAP

 

Prome Minister Evelyn Wever-Croes:

 

GRUPO DI STUDIANTE DI COLEGIO EPI A ENTREVISTA VARIOS MINISTER DEN CUADRO DI E VAK BURGERSCHAP

Prome Minister hunto cu otro ministernan a conoce mas preocupacionnan cu ta biba bou nos hubentud

ORANJESTAD – Diamars mainta 20 di Februari, Prome Minister Evelyn Wever-Croes y otro ministernan, a ricibi bishita di otro grupo di studiante di Colegio EPI. E biaha aki un grupo mas grandi di 25 hoben. Den cuadro di e vak Burgerschap, nan mester entrevista politiconan y riba nan peticion aki, ministernan a ricibi nan.

E studiantenan tawata hopi bon prepara pa e entrevista cu preguntanan hopi interesante y pa esaki Prome Minister hunto cu Minister Endy Croes di Enseñansa y Deporte, Minister Glenbert Croes di Labor, Integracion y Energia y Minister Rocco Tjon di Husticia y Asuntonan Social a atende nan y a contesta tur e preguntanan.

 

Durante e mainta interactivo aki por a conoce mas di e preocupacionnan cu ta biba bou nos hobennan entre otro di salud mental, e problematica di “drop-out” y tambe e desempleo bou nos hobennan. E porcentahe di desempleo bou hobennan ta mas halto cu esun general aunke esaki ta bahando pero ainda ta existi. Gobierno di Aruba ta compremeti y ta trahando riba e areanan di preocupacionnan aki. “Tawata un mainta cu preguntanan skerpi, hopi interactivo y hopi interesante. Nos a ricibi varios studiante den e dianan anterior caba y mescos cu nan, nos ta desea e grupo di studiante aki tambe, hopi exito”, Minister President a expresa.