Polis tin atenshon pa ladronisia di bestia den área di Banda Bou
KOMUNIKADO DI PRENSA 111/2024
6 mart 2024
Polis tin atenshon pa ladronisia di bestia den área di Banda Bou
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ
Kuerpo Polisial ta konsiente di e echo ku no opstante diferente esfuerso ku el a bin ta hasi,
ladronisia di bestia di krio, prinsipalmente kabritu, ta sigui ta un molèster ku ta asotá
habitantenan i muy en partikular doñonan di e bestianan aki, den Banda Bou.
Den e último lunanan di 2023 i na kuminsamentu di e aña aki tabatin diferente entrada
hudisial ku a tuma lugá, hustamente den kuadro di investigashonnan di ladronisia di kabritu
ku ta tumando lugá.
Tambe polis a sinta ku personanan di kua nan a pèrdè parti di nan krio i a informá nan di e
proseso i alabes a duna nan rekomendashon, kon nan mes por yuda evitá mas tantu posibel
di bira víktima di ladronisia.
Loke ku ta pone ku e investigashonnan aki ta tuma un poko mas tempu i eksigí mas
kapasidat, ta e echo ku tin diferente grupo di kriminal ku ta kometiendo e ladronisianan aki
na e parti wèst di Kòrsou.
Kuerpo Polisial ke enfatisá ku un di su tareanan prinsipal ta investigá aktonan penal, pone
man riba esnan kulpabel i di e forma ei tambe mantené e sentido di seguridat bou di
siudadanonan di nos pais.
Tur denunsiá hasí ta importante i ta wòrdu atendé ku e seriedat i koutela nesesario. I lo no
spar ningun esfuerso pa sigui duna e kasonan aki e atenshon nesesario.
Semper bai e apelashon ta keda riba tur siudadano ku ta disponé di informashon ku ta
relevante pa nos solushoná kualke krímen, pa tuma kontakto ku polis na e numbernan
akustumbrá.
Alabes nos ke bolbe atvertí esnan ku ta kumpra bestianan di krio prosedente di ladronisia,
ku nan ta hasi nan mes kulpabel na enkubrimentu, pa kua tin un kastigu di prizòn.
